GJKKO ka vendosur masën e sigurisë “detyrim paraqitje” për rektorin e Universitetit të Mjekësisë, njëkohësisht shefi i kirurgjisë Arben Gjatë, i cili është një nga personat e akuzuar për çështjen e koncesionit të sterilizimit.
Ndonëse urdhrat e arrestit u dhanë gjatë ditës së djeshme, Gjata është kthyer vetëm sot nga një vizitë jashtë shtetit dhe menjëherë është paraqitur pranë GJKKO.
Pas përfundimit të seancës, Gjata nuk ka preferuar të flasë për mediat me justifikimin se është në masë sigurie dhe nuk mund të shkelë sekretin hetimor.
Kujtojmë se Arben Gjata, në kohën kur u lidh koncesioni më dhjetor të vitit 2015 mbante detyrën e anëtarit të komisionit të koncesionit të sterilizimit.
Ndërkohë sipas dëshmisë së siguruar nga BalkanWeb gjatë marrjes në pyetje pak kohë më parë nga SPAK, sa i takon kësaj çështje është shprehur se: “Nga ajo çfarë kemi diskutuar në komision ka rezultuar se edhe nga ana ekonomike kjo ishte procedura më e favorshme.”
Gjata shprehej se infeksionet spitalore, ishin arsyeja kryesore, se përse koncesioni ishte mënyra e vetme për të përmirësuar situatën në spitalet në vend dhe për të patur një shërbim me cilësor. Por asnjë prej anëtarëve nuk shpjegoi dot, sesi kostot u rritën dhe se përse ata nuk kishin mundur të parashikonin këtë gjë. “Nga eksperienca që kam në këtë fushë mënyra e procedimit me prokurim të zakonshëm mund të çonte në dështim. Do duhej që të gjitha shërbimet e parashikuara të prokuroheshin me procedura të veçanta. Përsa i përket prokurimit të instrumentarit, mesa jam në dijeni, procedura e fundit e prokurimit të tyre është bërë në vitin 2004. Kompanitë seriozë që ofrojnë cilësinë më të lartë nuk janë të interesuara për tregun shqiptar. Ndërsa koncesioni në fjalë tërhoqi një kompani serioze, siç ishte ajo që fitoi procedurën.”, theksoi Gjata.
