SPAK ka dhënë pretencën për ish-shefin e Prokurorisë së Vlorës, Aurel Zarka, duke kërkuar dënimin e tij me 4 vite burg.
Me përfitimin e gjykimit të shkurtuar, dënimi mund të reduktohet në 3 vite heqje lirie.
Në seancën e së martës, Zarka nuk ishte i pranishëm, por përfaqësohej nga avokati i tij.
Prokurori Klodian Braho paraqiti kërkesën e Prokurorisë së Posaçme, duke deklaruar se hetimet kanë provuar përfshirjen e Zarkës në komunikime të fshehta përmes aplikacionit të enkriptuar “Sky ECC”.
Sipas dosjes hetimore, Zarka ka kërkuar para në të paktën dy raste për të ndikuar në çështje të trajtuara në Prokurorinë e Vlorës, njëra prej tyre në bashkëpunim me Radovan Çelën.
Në një nga rastet, oficerja e policisë gjyqësore Erjona Daupaj ka marrë 10 mijë euro për të ndërmjetësuar ndikim te ish-drejtuesja e Prokurorisë së Tiranës, Elisabeta Imeraj, me qëllim lehtësimin e një mase sigurie.
Po ashtu, sipas SPAK, vëllezërit Astrit dhe Radovan Çela kanë dhënë 50 mijë euro Daupajt, me qëllim që paratë t’i dorëzoheshin Imerajt për të ndikuar më tej te gjyqtarë të Tiranës.
