Pas pothuajse dy muajsh ngërçi dhe përpjekjesh të dështuara, sot në orën 11:00 pritet të zhvillohet tentativa e 29-të për konstituimin e Kuvendit të Kosovës, me objektivin për të zgjedhur kryetarin e tij dhe për të hapur rrugën drejt krijimit të institucioneve të reja, pas zgjedhjeve të 9 shkurtit.
Bllokada ka ardhur si pasojë e mospajtimeve ndërmjet partive politike, ku Lëvizja Vetëvendosje, fituese e zgjedhjeve, nuk ka arritur të sigurojë votat e nevojshme për të kaluar kandidaturën e Albulena Haxhiut për kryetare të Kuvendit.
PDK, LDK, AAK dhe NISMA kanë refuzuar emrin e saj, duke e pamundësuar zgjedhjen në të gjashtë raundet e deritanishme të votimit.
Në përpjekje për të kapërcyer bllokadën, Vetëvendosje së bashku me Guxo-n dhe Alternativën po kërkon që votimi të zhvillohet në mënyrë të fshehtë.
Por skeptikë për suksesin e kësaj seance janë edhe vetë kundërshtarët politikë. Kryetari i LDK-së, Lumir Abdixhiku, përmes një postimi në Facebook, paralajmëroi se edhe kjo përpjekje mund të përfundojë pa rezultat.
Ai ka propozuar një model alternativ një “Qeveri Uniteti” të mbështetur mbi një agjendë të përbashkët prej 15 pikash dhe bashkëpunim ndërpartiak.
Nëse dështon edhe kjo seancë, Kosova përballet me rrezikun e një krize të thellë institucionale, e cila mund të përshkallëzojë deri në shpërbërjen automatike të Kuvendit dhe, si rrjedhojë, mund të çojë në mbajtjen e zgjedhjeve të reja.
