Deputetët e zgjedhur të Kuvendit të Kosovës do të mblidhen sërish sot në përpjekjen e 53-të për të konstituuar legjislaturën e nëntë, të dalë nga zgjedhjet e 9 shkurtit.
Seanca është parashikuar të mbahet në orën 14:00, vetëm dy ditë pasi Gjykata Kushtetuese vendosi një masë të përkohshme që ndalon marrjen e vendimeve nga Kuvendi deri më 8 gusht.
Kjo masë, e cila ka hyrë në fuqi që nga e diela e 27 korrikut, u mor pas kërkesës së dorëzuar nga Partia Demokratike e Kosovës dhe Lidhja Demokratike e Kosovës.
Edhe pse Kuvendi mund të vazhdojë të mblidhet për të konsumuar afatin kushtetues prej 30 ditësh për konstituim, ai nuk mund të marrë asnjë vendim të vlefshëm gjatë kësaj periudhe.
Bllokada institucionale lidhet me mosmarrëveshjet ndërmjet partive politike për postin e kryetarit të Kuvendit, që sipas rregullit i takon Lëvizjes Vetëvendosje si fituese e zgjedhjeve.
Kandidatura e Albulena Haxhiut ka hasur kundërshtime nga partitë opozitare, të cilat kanë kontestuar si emrin e propozuar, ashtu edhe mënyrën e votimit, duke kërkuar që ajo të zhvillohet me votim të hapur, e jo të fshehtë.
Deri tani, Vetëvendosje, së bashku me Guxo dhe Alternativa, nuk kanë arritur të sigurojnë shumicën e nevojshme për ta zgjedhur kryetarin e Kuvendit, duke sjellë një krizë institucionale që po thellohet dita-ditës.
Pas dështimit të 52-të në fundjavë, përfaqësues të komunitetit ndërkombëtar, të pranishëm në sallën e Kuvendit, shprehën hapur shqetësimin për situatën e pazgjidhur dhe për ndikimin që mund të ketë në stabilitetin politik të vendit.
