Skandal në gjyqin për vdekjen e Maradonës/ Analizat mund të jenë të babait të tij

Një kthesë e pazakontë ka tronditur gjyqin për vdekjen e Diego Armando Maradonës në San Isidro të Argjentinës. Procesi është pezulluar pasi mbrojtja ngriti dyshimin se disa prej analizave mjekësore të përdorura në dosje mund të mos i përkasin legjendës së futbollit, por babait të tij, Don Diego.

Sipas avokatëve mbrojtës, bëhet fjalë për rezultate të analizave të veshkave, të cilat janë paraqitur në gjykatë si pjesë e dokumentacionit mjekësor të Maradonës. Por emri i njëjtë i babë e bir ka ngritur një pikëpyetje të fortë: analizat mund të jenë në fakt të Don Diegos, babait të Maradonës, i cili ndërroi jetë në vitin 2015.

Dyshimi ka qenë aq serioz sa trupi gjykues, i kryesuar nga gjykatësi Alberto Baque, ka ndërprerë procesin dhe ka urdhëruar një ekspertizë për të përcaktuar se kujt i përkasin realisht testet.

Përgjigjja pritet më 27 gusht, kur do të kryhet verifikimi që duhet të përcaktojë nëse analizat janë të “El Pibe de Oro” apo të babait të tij.

Zhvillimi sjell një tjetër goditje për procesin gjyqësor mbi vdekjen e Maradonës, i cili ndërroi jetë në nëntor të vitit 2020, në moshën 60-vjeçare.

Në bankën e të akuzuarve janë shtatë profesionistë të kujdesit shëndetësor, të cilët akuzohen për neglizhencë në trajtimin e legjendës argjentinase. Sipas akuzës, Maradona mori kujdes të papërshtatshëm gjatë periudhës më delikate të rikuperimit, vetëm dy javë pas një operacioni për emboli cerebrale.

Por ky nuk është skandali i parë që godet procesin. Gjyqi i parë u anulua vitin e kaluar pas rreth dy muaj e gjysmë seancash, pasi u zbulua se një prej gjyqtarëve kishte marrë pjesë në një dokumentar klandestin për çështjen.

Tashmë e gjithë vëmendja është përqendruar te ekspertiza e 27 gushtit. Nëse konfirmohet se analizat e futura në dosje i përkasin babait të Maradonës, procesi për vdekjen e një prej ikonave më të mëdha të futbollit botëror do të përballet me një tjetër problem serioz mbi provat e përdorura në gjykatë.