Deputeti i Partisë Demokratike, Saimir Koreshi, ka theksuar progresin e bërë në zgjidhjen e mosmarrëveshjeve mes mazhorancës dhe opozitës në mbledhjen e sotme të Këshillit të Legjislacionit. Gjatë mbledhjes u diskutuan vendimet e Gjykatës Kushtetuese, me fokus të veçantë në ato që prekin çështje të rëndësishme sociale si arsimi.
Koreshi u shpreh i kënaqur me faktin se palët arritën të gjejnë një konsensus, duke e kundërvënë këtë me mbledhjen e mëparshme ku ishin të nevojshme shërbimet e një interpreti për të kuptuar vendimet e Gjykatës. “Ideja është që shyqyr gjetëm këtë konsensusin, sepse në mbledhjen e fundit nuk e gjetëm. U desh të merrnim interpret të Gjykatës Kushtetuese, se nuk dinim t’i lexonim vendimet,” theksoi Koreshi.
Ai shtoi se shpreson që vendimi i ardhshëm që do të merret për studentët të mos i ngjajë vendimeve të mëparshme që kanë ngelur në fuqi dhe që nuk kanë qenë në favor të tyre. “Shyqyr që gjetëm këtë konsensusin, të cilin e gjetëm kaq shpejt dhe mos na daltë si vendimet e fundit të Gjykatës Kushtetuese dhe ky vendim, së paku ky për studentët,” përfundoi ai.
Ky përmirësim në komunikimin dhe marrëveshjen ndërmjet palëve politike shihet si një hap pozitiv drejt adresimit të çështjeve që ndikojnë direkt në jetën e qytetarëve, veçanërisht të rinjtë dhe studentët.
