Shqiptarët punojnë për bukën e gojës, europianët për të jetuar: Shifrat alarmante

Shqiptarët shpenzojnë pothuajse gjysmën e buxhetit familjar për ushqim, ndërsa europianët vetëm 13.2%. Të dhënat e INSTAT dhe Eurostat për vitin 2025 zbulojnë hendekun e thellë të mirëqenies mes Shqipërisë dhe Bashkimit Europian, ku për shumë familje shqiptare sigurimi i nevojave bazë mbetet sfida kryesore ekonomike.

Sipas të dhënave të publikuara nga Monitor, 39.8% e shpenzimeve të familjeve shqiptare shkojnë për ushqime dhe pije joalkoolike, rreth tre herë më shumë se mesatarja europiane.

Diferenca është e dukshme edhe te cilësia e jetesës. Shqiptarët shpenzojnë vetëm 2.8% të buxhetit për argëtim dhe kulturë, ndërsa europianët 7.7%. Për transportin, raporti është 7.2% në Shqipëri kundrejt 12.5% në BE, ndërsa për restorante dhe akomodim 7.5% kundrejt 9.5%.

Shqiptarët shpenzojnë proporcionalisht më shumë për arsim, me 3.3% të buxhetit kundrejt 0.9% në BE, si dhe për veshje, këpucë e pajisje shtëpiake. Megjithatë, disa diferenca ndikohen edhe nga mënyra e financimit të shërbimeve publike dhe metodologjia e matjes.

Shifrat nxjerrin në pah një realitet shqetësues: ndërsa europianët kanë më shumë mundësi të shpenzojnë për pushime, kulturë dhe cilësi jete, familjet shqiptare vazhdojnë të përqendrojnë një pjesë jashtëzakonisht të madhe të buxhetit te ushqimi.

Shqipëria synon integrimin në Bashkimin Europian, por standardi i jetesës së qytetarëve mbetet larg mesatares europiane.