Viti 2024 solli një ndryshim të paprecedentë në tregun shqiptar të automjeteve. Për herë të parë, Koreja e Jugut u bë burimi kryesor i makinave të importuara në vend, duke thyer dominimin shumëvjeçar të Italisë.
Sipas të dhënave zyrtare, nga rreth 100 mijë mjete të regjistruara për herë të parë gjatë vitit të kaluar, 19.1% kishin si vend origjine Korenë e Jugut.
Italia, që tradicionalisht ka qenë partneri kryesor në këtë treg, u rendit këtë herë në vend të dytë. Ndërkohë, ekspertët shprehin shqetësime për mungesën e standardeve dhe kontrolleve mbi mjetet që futen në vend.
Fatmir Hasho, inxhinier mekanik, në një intervistë për Vizion Plus theksoi:
“Shqetësimi im lidhet me faktin se vet prodhimi për Azi është për standardin e tyre dhe jo për standardin europian. Pyetja që unë bëj është: A mundet që këto makina që vijnë nga Koreja të shiten në tregun europian? Përgjigja është absolutisht jo. Kjo, jo sepse Europa ka prodhimet e saj, por se këto mjete kanë disa veçori dhe elemente të cilat Europa nuk i pranon.”
Sipas Hashos, Shqipëria po funksionon si një treg i pakontrolluar, ku mungesa e rregullave bën që të importohen mjete me cilësi dhe standarde të dyshimta:
“Është për të ardhur keq. Ne këtu nuk kemi tra, pra nuk kemi kufizime. Tek ne hyn çdo lloj makine. Po na dominojnë ato makina të cilat nuk i përmbushin standardet europiane, atje ku duam të shkojmë.”
Në vendet e Bashkimit Europian, funksionon Zyra e Homologimit për të kontrolluar dhe verifikuar përputhshmërinë e automjeteve me standardet.
Edhe pse në Shqipëri ekziston një zyrë me të njëjtin emër, Hasho thotë se ajo është vetëm në letër dhe nuk ushtron funksion real.
