Viti i ri shkollor 2025–2026 nis ndryshe për mijëra nxënës në të gjithë vendin. Ministria e Arsimit, bashkë me Ministrinë e Ekonomisë, Kulturës dhe Inovacionit, ka miratuar një udhëzim të ri që synon t’i japë fund kaosit me celularët në klasa dhe të vendosë bullizmin në qendër të masave parandaluese.
Dokumenti, i botuar në Fletoren Zyrtare, prek çdo detaj të jetës shkollore: që nga regjistrimet, shpërndarja e librave, e deri tek sjellja e nxënësve dhe përgjegjësia e mësuesve. Shkollat janë të detyruara të afishojnë listat me tekstet, botuesit dhe çmimet, në mënyrë që prindërit dhe nxënësit të kenë qartësi dhe transparencë. Për klasat I–IX librat do të jepen falas, ndërsa drejtuesit e shkollave duhet të garantojnë që të gjithë nxënësit të pajisen me to përpara nisjes së mësimit.
Por ndryshimi më i ndjeshëm do të jetë ndalimi i telefonave. Celularët nuk do të kenë më vend në ambientet shkollore, një masë që synon të rikthejë vëmendjen te mësimi dhe komunikimi i drejtpërdrejtë mes nxënësve dhe mësuesve.
Në të njëjtën kohë, bullizmi trajtohet si sfida më e madhe sociale brenda shkollave. Plani Kombëtar i Veprimit, miratuar në janar, detyron çdo shkollë të ngrejë kënde “Stop dhunës në shkollë” dhe ekipe “antibulling”, të organizojë aktivitete sensibilizuese dhe të monitorojë nga afër komisionet e etikës dhe disiplinës. Më 21 nëntor, të gjitha institucionet arsimore do të zhvillojnë veprimtari të posaçme për Ditën Ndërkombëtare kundër Dhunës në Shkollë.
Ky udhëzim i ri është një përpjekje për ta bërë shkollën një vend më të sigurt, më të drejtë dhe më social, ku fëmijët të mësojnë jo vetëm lëndët, por edhe respektin dhe bashkëjetesën.
