Pramila Patten, përfaqësuesja speciale e OKB-së për dhunën seksuale në konfliktet e armatosura, denoncoi sot nga Nice një tendencë “shumë shqetësuese” që e cilësoi si një “arme të padukshme, të lirë dhe efektive të luftës”, e cila po përdoret në konfliktet që po ndodhin në shumë vende të botës.
Patten tha se raporti për vitin 2022 paraqet një pamje të frikshme të dhunës seksuale si taktikë e përdorur në mënyrë sistematike, përfshirë torturë, terrorizëm dhe shtypje politike. Edhe pse mjetet ligjore janë vendosur tani në nivel global për të luftuar këtë fenomen, raporti i vitit 2023, që do të shqyrtohet në prill, tregon që tendencat e këqija vazhdojnë.
Përfaqësuesja e OKB-së ka kryer misione gjatë vitit të kaluar në vende si Ukraina, Kolumbi, Republika Demokratike e Kongos, Republika e Afrikës Qendrore dhe Sudan i Jugut. Ajo ka planifikuar një udhëtim në Izrael për të marrë të dhëna lidhur me akuzat për dhunë seksuale gjatë sulmit të 7 tetorit nga Hamasi. Ndërkohë, pritet që ajo të takojë të mbijetuar, dëshmitarë dhe persona të tjerë të prekur nga dhuna seksuale, duke përfshirë pengje dhe të burgosur të liruar së fundmi.
