Ish-ministri i Brendshëm Sandër Lleshaj, u rikthye në qendër të vëmendjes pas deklaratave të bërë lidhur me vrasjen e nënkomisarit Saimir Hoxha. Lleshaj tha se ashtu si në rastin e Klodian Rashës, qytetarët duhet të ngrihen e të protestojnë edhe për vrasjen e një polici. Thënë këtë, Lleshaj thuajse nënkuptonte se jeta e një polici është më me vlerë se e një qytetari të thjeshtë dhe përjashton faktin se të dyja palët mund të ngrejnë zërin për njëra-tjetrën.
Mirëpo, teksa ishte i ftuar në emisionin “Open”, ku kërkonte të dinte punonjësit social e kujdestarët e 21-vjeçarit Aldi Rama, gazetari Elton Qyno i ka bërë të qartë se edhe vetë ish-ministri është një prej problemeve.
Qyno tha se Lleshaj është personi i fundit që mund të bëjë moral për policinë, pasi sapo erdhi në detyrë bleu një makinë të shtrenjtë dhe me të shëtiste gjithë Shqipërinë. Lleshaj tentoi t’i shmangej konstatimit me ironi, duke thënë se ndërhyrhja e Qynos nuk kishte lidhje me ngjarjen. Ish-ministri tha se ka dhënë dorëheqjen pikërisht për arsyen se ka moral dhe nuk e pranon që një strukturë të mos funksionojë.
Pjesë nga debati:
“Kam frikë se fokusohemi 5 minuta të kjo ngjarje, merremi 3 ditë dhe pas tre ditësh fshihet. Do doja të dija kush janë mësuesit, punonjësit social dhe kujdestarët ligjorë të atij djali”, tha Lleshaj.
Qyno: Është i pari ministër, i cili ka blerë një makinë të shtrenjtë dhe shëtiste me të gjithë Shqipërisë.
Lleshaj: Të falenderoj për këtë ndërhyrje shumë profesionale, shumë të goditur, në lidhje me ngjarjen.
Ervin Karamuça: Nuk mund të flasë dikush që është dorëhequr për çështje morali. Nuk ka përse të flasë dikush që është tërhequr. Autoriteti është nëpërkëmbur, na ka ikur autoriteti i shtetit, jemi akoma në vitin 1997
Lleshaj: Dorëheqja është shpjeguar sepse kam moral ndaj jam larguar, nuk pranoj që nëse nuk funksionon në strukturë kam dhënë dorëheqjen për vendosjen e standartit moral.
