Një konflikt i dhunshëm ka ndodhur ditën e djeshme në plazhin e Ksamilit, ku është dhunuar brutalisht shtetasi Albert Pashaj, pronar i “Euro Hotel Ksamil”.
Ai u përball me tre persona, të cilët fillimisht debatuan me të, e më pas e goditën fizikisht në sy të pushuesve, me grushte, shkelma dhe mjete të forta.
Një nga autorët dyshohet se e ka qëlluar në nofull, ndërsa një tjetër ka përdorur mjete të forta, duke e lënë të gjakosur.
Menjëherë pas ngjarjes, policia e Sarandës vuri në pranga tre shtetas: Agim Taraj, 43 vjeç, banues në Berat dhe pronar i “Sunset Restorant Ksamil”, Silvjan Sulku, 18 vjeç dhe Aldo Zeqiraj, 35 vjeç – të dy nga Dibra. Po ashtu, një 17-vjeçar nga Kamza u procedua penalisht për përfshirjen në këtë ngjarje.
Sipas burimeve zyrtare, konflikti mes Pashajt dhe Tarajt ka qenë i hershëm dhe është përshkallëzuar për shkak të një mosmarrëveshjeje mbi përdorimin e një hapësire publike të plazhit, që ndodhet përballë hotelit të Pashajt.
Të dy sipërmarrësit kishin aplikuar pranë Agjencisë Kombëtare të Bregdetit për të marrë leje vendosjeje çadrash në të njëjtën zonë. Pashaj pretendon se kishte fituar të drejtën për të vendosur 52 çadra për hotelin e tij me 26 dhoma, por për shkak të mungesës së ndërhyrjes së bashkisë për matjet përkatëse, u skualifikua nga AKB.
Nga ana tjetër, familjarë të Agim Tarajt deklarojnë se ai, pas refuzimit të lejes për hapësirën bregdetare, ka braktisur planet për të marrë një hotel me qira dhe ka vijuar vetëm me administrimin e “Sunset Restorant”, që ndodhet në zonë prej 16 vitesh.
Ngjarja e dhunshme në Ksamil ka rikthyer në vëmendje tensionet gjithnjë në rritje për kontrollin e hapësirave bregdetare në jug të vendit, veçanërisht në zonat me fluks të lartë turistik, ku mungesa e rregullave të qarta dhe ndërhyrjes shtetërore vazhdon të krijojë përplasje mes biznesve lokale.
