Sipas raportit më të fundit të Organizatës Botërore të Shëndetësisë, problemet e shëndetit mendor po përhapen me ritme shqetësuese në Europë, duke përfshirë edhe Shqipërinë.
Aktualisht, rreth 17% e popullsisë në kontinent përjeton çrregullime të ndryshme psikike, nga ankthi dhe depresioni, deri te çrregullimet e humorit.
Ekspertët theksojnë se ndjenja e vetmisë është veçanërisht e përhapur mes dy grupeve vulnerabël: personave mbi 60 vjeç dhe vajzave adoleshente.
Në shifra kjo përkthehet në 1 nga 4 persona në të dyja këto grupe që ndihen të vetmuar në mënyrë të theksuar.
Në të njëjtën kohë, një pjesë shqetësuese e të prekurve nuk po marrin trajtimin e nevojshëm: 1 në 3 persona me çrregullime mendore dhe 1 në 4 me diagnozë psikozë nuk ndjekin trajtim adekuat.
Problemi përkeqësohet edhe nga mungesa e specialistëve të shëndetit mendor në sistemin shëndetësor.
Kjo situatë ka pasoja serioze në shoqëri, pasi problemet e shëndetit mendor janë një ndër shkaqet kryesore të vetëvrasjeve.
Në moshën 15-29 vjeç, çdo ditë humbin jetën rreth 400 persona për shkak të këtij fenomeni.
Përballë këtyre treguesve, ekspertët kërkojnë që shëndeti mendor të bëhet prioritet për qeveritë dhe institucionet shëndetësore, duke theksuar nevojën për bashkëpunim të ngushtë mes aktorëve të ndryshëm për të ulur këto shifra shqetësuese.
