Seanca e ish-krerëve të UÇK-së është duke vazhduar në Hagë, ndërsa avokatët e tyre mbrojtës kanë kërkuar që të kenë një listë të dëshmitarëve. Megjithatë Zyra e Prokurorit të Specializuar nuk ka rënë dakord që ta dorëzojë listën me dëshmitarët që protet të përdorë në gjykimin për Hashim Thaçin, Jakup Krasniqin, Kadri Veselin dhe Rexhep selimin.
Avokati i ish-presidentit Hashim Thaçi, Luka Mishetiç tha se Prokuroria duhet t’ua japë listën në mënyrë që edhe ekipet mbrojtëse të përgatiten për gjykimin. Avokatët e Kadri Veselit dhe Rexhep Selimit ranë gjithashtu dakord me kërkesën e ngirtur nga avokati i Thaçit.
“Për cilët dëshmitarë kërkon t’i thërrasë në gjykim dhe cilët nuk do t’i thërrasë. Kemi dëshmitarë për të cilët ZPS-ja ka marrë deklaratë dhe mendoj se ata do të dëshmojnë. Ne kemi nevojë që të vendosim përparësi në përgatitjet tona, dhe këtë e bëjmë duke e ditur se cilët dëshmitarë do të dëshmojnë në sallë. Prandaj, kërkojmë që Prokuroria ta bëjë një listë”, tha Mishetiç.
Megjithatë, prokurorja nga Zyra e Prokurorit të Specializuar e quajti kërkesën e palës mbrojtëse të ish-krerëve të UÇK-së si “jashtë kontekstit”, duke shtuar se lista paraprake e dëshmitarëve publikohet në rrethana shumë të veçanta dhe uhdëzime të rrepta.
“Kjo kërkesë nga mbrojtja është komplet jashtë kontekstit dhe pa pasur parasysh veçantitë e çështjes sonë gjyqësore. Koncepti i listës paraprake të dëshmitarëve është element që duket se mbrojtja e ka marrë në një çështje të paraqitur nga Gjykata Penale Ndërkombëtare. Lista paraprake e dëshmitarëve publikohet në rrethana shumë të veçanta, me udhëzime shumë të rrepta. Nuk jemi në ato rrethana. Kjo nuk është rrethanë të cilën e shohim në procesin tonë”, u shpreh prokurorja.
Ndërkohë, avokati Luka Mishetiç u përgjigj duke thënë se derisa të jepet një arsye e fortë se pse lista nuk dorëzohet, ata do vazhdojnë ta kërkojnë atë. Avokati amerikano-kroat tha se nuk sheh asnjë arsye pse Prokuroria e ka kaq të vështirë ta dorëzojë listën.
