Sazani dhe Karaburuni janë kthyer në dy nga destinacionet më të preferuara të këtij sezoni veror në Vlorë, duke tërhequr çdo ditë qindra turistë vendas e të huaj.
Mbi 100 mjete lundruese nisen çdo ditë nga porti dhe marina turistike e qytetit, për të transportuar vizitorët drejt këtyre zonave të mbrojtura, të qeta dhe të paprekura, ku natyra mbizotëron dhe ndërhyrja njerëzore është minimale.
Udhëtimi drejt brigjeve kristalt të Sazanit dhe gjirit të Karaburunit është tashmë pjesë e pandashme e përvojës turistike në Vlorë.
Turistët shprehen të entuziazmuar jo vetëm për bukurinë natyrore, por edhe për mikpritjen dhe raportin cilësi–çmim, që e konsiderojnë ndër më të mirët në rajon.
“Unë jam nga Holanda. Vlora është shumë e bukur, ka natyrë të mrekullueshme dhe njerëz shumë të mirë. Po kalojmë një eksperiencë të jashtëzakonshme. Çmimet janë shumë të mira, shumë më të lira krahasuar me Hollandën, dhe shërbimi është i shkëlqyer. Edhe mbesat e mia do të vijnë nesër këtu nga Holanda,” thotë një turiste holandeze.
Një shprehet një tjetër turist holandez shprehet: “Unë jam nga Holanda dhe po qëndrojmë këtu në Vlorë për 15 ditë. Nuk do të lëvizim nga qyteti sepse gjithçka është perfekte. Vlora është shumë e bukur, njerëzit janë të mrekullueshëm, çmimet të përballueshme dhe natyra mbresëlënëse. Po përjetojmë ndoshta eksperiencën më të mirë që kemi pasur ndonjëherë në Europë.”
“Jemi nga Irlanda. Jemi në Vlorë prej 5 ditësh dhe do të qëndrojmë gjithsej 7 ditë. E dua shumë Shqipërinë – aq shumë sa nuk dua të kthehem në shtëpi! Jam shumë e kënaqur me shërbimin, dhe gjithçka do ta rekomandoja. Çmimet janë shumë të mira, ndërsa njerëzit absolutisht të mrekullueshëm,” thotë një turiste nga Irlanda.
“Unë vij nga Irlanda. Do të qëndrojmë 7 ditë dhe tashmë kanë kaluar 5. Më pëlqen shumë Vlora dhe Karaburuni. Po kalojmë një eksperiencë të mrekullueshme. Jemi shumë të kënaqur me shërbimin dhe ushqimin e ofruar. Çmimet janë të favorshme,” tregon një tjetër turist nga Irlanda.
Sazani dhe Karaburuni janë shndërruar në simbole të turizmit të qëndrueshëm dhe natyror në jug të Shqipërisë.
Me brigje të pastra, ujë të kthjellët dhe peizazhe mbresëlënëse, këto zona u ofrojnë turistëve jo vetëm pushime relaksuese, por edhe përvoja unike që mbeten gjatë në kujtesë.
Vlora këtë verë jo vetëm që ka fituar vendin e saj në hartën e destinacioneve më të kërkuara, por ka hyrë fort edhe në zemrat e vizitorëve që e zbulojnë për herë të parë.
