Apeli ka vendosur këtë të enjte që të lënë në fuqi masën e sigurisë “arrest shtëpie”, për ish-zëvendës-ministren e Brendshme, Rovena Voda.
Ish-ministrja Voda akuzohet se ka marr 2 mijë Euro ryshfet për punësimin në Ministrinë e Brendshme të shtetases Florida Beu. Gjykata e posaçme e Apelit ka vendosur që mos të ndryshojë masën për Vodën pavarësisht kërkesës së saj. Në arrest shtëpie po ashtu do të qëndrojë edhe avokatja Majlinda Hasani, e cila u arrestua në operacionin që çoi në pranga ish zv/ministren.
Voda mësohet të ketë thënë se nuk ka kryer asnjë shkelje ligjore dhe se ka respektuar në mënyrë rigoroze ligjin dhe ushtrimin e detyrës.
“Nuk kam kryer ndonjë shkelje ligjore apo ushtrim ndikimi. Kam respektuar në mënyrë rigoroze ligjin ne ushtrimin e detyrës. Nuk ekzistojnë kushtet për caktimin e masës. Gjykata e shkallës së parë ka vlerësuar apriori vetëm kërkesën e prokurorisë. Është i gabuar qëndrimi që rreziku për të shkatërruar provat apo për t’u larguar është prezumuar. Në cdo rast duhet të vërtetohen të gjitha pretendimet e prokurorisë për këto fakte e rrethana.”
Voda dhe Hasani kërkuan ndryshim të masës së sigurisë me argumentin se është e paarsyeshme që për një çështje që i përket 2019-2020 të mbahen nën arrest, ndërkohë që nuk ka rrezik të largohen apo të prishin provat. Përgjimet zbuluan se Rovena Voda kishte marrë 1 mijë euro, një arkë me peshk dhe një telefon ryshfet për një punësim në Ministri.
