Temperaturat ekstreme që kanë përfshirë vendin gjatë verës kanë sjellë një rritje të ndjeshme të rasteve të helmimeve, duke vënë në alarm Shërbimin e Toksikologjisë në QSUT, i cili po përballet me një fluks të lartë pacientësh.
Sipas mjekëve, intoksikimet nga alkooli, shpesh i kombinuar me substanca narkotike janë ndër rastet më të shpeshta, veçanërisht gjatë fundjavave pas festave dhe aktiviteteve sociale. Pacientët më të shpeshtë janë të rinjtë mbi 18 vjeç, si djem ashtu edhe vajza.
“Përdorimi i alkoolit rritet gjatë vapës, pasi njerëzit e konsumojnë me idenë se i freskon, por në realitet, ai shton rrezikun e toksicitetit,” shpjegon mjekja toksikologe.
Ajo thekson se temperaturat e larta e përshpejtojnë efektin helmues të alkoolit, duke çuar në raste të rënda, përfshirë edhe koma alkoolike.
“Kur kombinohet me probleme si tensioni i lartë apo i ulët, situata bëhet edhe më e rrezikshme”, paralajmëron ajo.
Përveç intoksikimeve, toksikologjia po përballet edhe me raste urgjente të kafshimeve nga gjarpërinjtë dhe pickimeve nga merimangat e zeza.
Çdo ditë, 1 deri në 2 persona, kryesisht fermerë paraqiten në QSUT me shenja helmimi pas kontaktit me kafshë të rrezikshme.
“Simptomat fillestare janë dhimbja dhe shenjat e dhëmbëve. Këshilla jonë është që personat të shmangin ndërhyrjet në plagë, mos ta lidhin apo çajnë por të shkojnë sa më shpejt në një qendër mjekësore,” këshillon Kambo.
Mes pacientëve të shumtë që kërkojnë ndihmë janë edhe turistët, të cilët raportojnë probleme të ngjashme, që nga abuzimi me alkoolin e substancat narkotike, deri te rastet e helmimeve nga pickimet e gjarpërinjve në natyrë.
