Në Shkodër, rastet e pacientëve të diagnostikuar me tuberkuloz kanë shënuar një rritje vit pas viti.
Mjekja pneumologe Genta Smaja tregon se pas periudhës së Covid-it, janë diagnostikuar 15-20 raste të reja çdo vit, duke përfshirë të rinj që paraqiten në fazën fillestare të sëmundjes, shpesh me prekje pulmonare.
Ajo gjithashtu thekson se ka raste më të rënda tek pacientët e moshuar, por rastet te të rinjtë janë gjithashtu të shpeshta.
“Në Shkodër situata vitet e fundit, pas Covid vihet re 15-20 raste të reja të diagnostikuara në vit për shkak të përdorimit të kortikoterapisë. Pamë rritje të pacientëve të moshave të reja që na vijnë në fazën fillestare. Me prekje pulmonare. Ka pacientë me mosha të avancuara me forma më të rënda të tuberkulozit. Janë të shpeshta rastet te të rinjtë”, u shpreh Genta Smaja mjeke pneumologe.
Edhe pse ka ende një stigmatizim rreth sëmundjes, Smaja sqaron se tuberkulozi është plotësisht i trajtueshëm nëse kapet në kohë dhe mjekohet sipas udhëzimeve ndërkombëtare. Ajo thekson se është e rëndësishme që pacientët të ndjekin trajtimin në mënyrë të rregullt dhe të konsultohen me pneumologun.
“Tuberkulozi është i shërueshëm, por ka rëndësi të ndiqet në mënyrë të rregullt dhe të afërt me pneumologun dhe të trajtohet sipas skemave të përcaktuara ndërkombëtarisht. Është stigmë, por është e trajtueshme dhe e shërueshme”, tha mjekja Smaja.
Në Shqipëri, çdo vit diagnostikohen rreth 250 raste të tuberkulozit, ndërsa në rang global kjo shifër arrin deri në 11 milionë raste në vit.
