Risi në Premier League, tifozët do të dëgjojnë komunikimet mes arbitrave dhe futbollistëve

Premier League sjell një risi në arbitrim për sezonin 2026/27. Gjatë transmetimeve të drejtpërdrejta të ndeshjeve do të lejohet, në mënyrë të kufizuar, të dëgjohen komunikimet mes arbitrave dhe futbollistëve në fushë.

Përdorimi i audios nga transmetuesit që zotërojnë të drejtat televizive të Premier League në Angli vjen si pjesë e zgjerimit të sistemit RefCam, i cili tashmë është bërë pjesë e përhershme e futbollit anglez.

Kamerat e arbitrave, të vendosura në kokën e gjyqtarëve, janë përdorur nga transmetuesit për të ofruar pamje të afërta dhe përsëritje të menjëhershme të episodeve të ndeshjeve. Në këtë mënyrë, tifozëve u ofrohet një këndvështrim tjetër i asaj që ndodh në fushë. Megjithatë, sipas marrëveshjes së deritanishme me klubet, audioja e regjistruar nga këto kamera nuk mund të transmetohej gjatë ndeshjes dhe publikohej vetëm disa ditë më vonë.

Rregullorja e re që hyn në fuqi këtë sezon ndryshon pjesërisht këtë praktikë. Transmetuesit do të mund të përdorin audion e kamerave të arbitrave gjatë transmetimit të drejtpërdrejtë, por vetëm në mënyrë të kufizuar. Për çdo ndeshje të Premier League pritet të transmetohen një ose dy episode të përzgjedhura.

Megjithatë, kufizimet mbeten të qarta. Audioja nuk do të përfshijë komunikimet që lidhen me sistemin VAR, pasi transmetimi i tyre nuk lejohet sipas rregullave të lojës të përcaktuara nga IFAB.

Eksperimenti me audion do të testohet fillimisht përpara se të aplikohet gjatë ndeshjeve. Për këtë arsye, risia nuk do të përdoret në fundjavën e parë të Premier League për sezonin 2026/27.