Rinumërimi i votave për Qarkun e Tiranës po shkon drejt përfundimit. Sot, në ditën e nëntë të këtij procesi, në pallatin e sportit “Farie Hoti” pritet të hapen edhe 69 kutitë e fundit.
Deri tani janë rinumëruar 1138 nga 1207 kuti në total, ku nuk janë evidentuar ndryshime domethënëse në renditje, por janë zbuluar një sërë gabimesh teknike që kanë sjellë pakënaqësi nga ana e kandidatëve.
Gjatë procesit janë evidentuar qindra vota të konsideruara më herët të vlefshme, por që rezultuan të pavlefshme pas kontrollit të dytë.
Partia Demokratike është ajo që ka humbur më shumë vota të pamerituara, me 594 të tilla. Partia Socialiste humbet 377 vota, ndërsa subjekte të tjera si Lëvizja Bashkë (57), Nisma Shqipëria Bëhet (45), Partia Mundësia (43) dhe PSD (34) kanë humbje më të vogla. Koalicioni Euroatlantik i Lulzim Bashës humbet gjithashtu 21 vota, të cilat janë hequr nga rezultati fillestar.
Në radhët e kandidatëve, rinumërimi ka nxjerrë në pah shtesa të pamerituara votash në llogaritë e disa emrave të njohur.
Në PD, Jorida Tabaku kryeson me 256 vota të pavlefshme të cilat do të zbriten nga rezultati i 11 majit, ndërsa Ilir Alimehmeti humbet 135 vota. Në Kavajë, ku u hapën gjithashtu disa kuti, Ilir Meta i cili nga burgu pretendonte për manipulime – ka rezultuar me 61 vota të pamerituara. Edhe Myslim Murrizi ka humbur 44 vota.
Në partinë socialist, më i prekuri është ministri Ervin Hoxha me 287 vota që konsiderohen pa meritë. Pas tij renditen Fatmir Xhafaj me 227 vota, Erion Braçe me 164, Xhemal Qefalia me 125 dhe Olta Xhaçka me 48 vota të pavlefshme. Ndërkohë, Blerina Gjylameti ka fituar 17 vota që nuk i ishin llogaritur më 11 maj, por sërish nuk arrin të përmbysë diferencën me një kolege të saj.
Për Tiranën pritet që rinumërimi të mbyllet brenda ditës së sotme. Më pas procesi do të zhvendoset në Fier, dhe më tej në Durrës, ku do të shqyrtohen edhe disa kuti që i përkasin votave nga diaspora.
