404 apartamente të reja janë ndërtuar në qendër të Vorës, të destinuara për familjet që humbën shtëpitë e tyre gjatë tërmetit të 26 nëntorit. Këto shtëpi janë falas dhe janë projektuar për të qenë më të sigurta dhe komode se ato që u shkatërruan.
Kryeministri Edi Rama, së bashku me Zëvendëskryeministren dhe Ministrin e Infrastrukturës dhe Energjisë, Belinda Balluku, dhe Kryebashkiakun e Vorës, Blerim Shera, inspektuan këto apartamente që shumë shpejt do t’i dorëzohen banorëve. Gjatë vizitës, Kryeministri u shpreh me entuziazëm për cilësinë e ndërtimit dhe përfitimet që ofrojnë këto shtëpi.
Kryebashkiaku Shera njoftoi se tashmë janë shpërndarë 130 apartamente dhe se të tjerat do të ndahen përmes lotarisë së organizuar. Gjithashtu, zonat e reja rezidenciale përfshijnë parkime nëntokësore me rreth 300 vende në total.
Në një nga apartamentet, Kryeministri Rama theksoi vlerën e tyre, duke thënë: “Se çfarë nuk ju kanë thënë e çfarë nuk keni dëgjuar, por ajo që është e rëndësishme të thuhet sot është se këto janë shtëpitë tuaja dhe ju nuk keni asnjë detyrim. Asnjë kokërr leku, asnjë kredi, asnjë borxh, asnjë gjë. I keni pronën tuaj, ta gëzoni dhe bëni si të doni, vetëm mirëmbajeni, jo shtëpinë brenda, por gjithë këtë ambient mirëmbajeni për të mirën e të gjithëve e për fëmijët. Kjo është e vetmja gjë që keni ju detyrë. I pashë shtëpitë dhe janë si të jesh në mes të Tiranës, por atje kushtojnë shumë, kurse këtu janë falas!”
