Ka nisur pak minuta më parë seanca plenare, ku pritet të votohet shkarkimi i presidentit Ilir Meta. Kreu i Komisionit Hetimor për shkarkimin e kreut të shtetit, alket Hyseni, ka prezantuar nga foltorja e Kuvendit raportin e hartuar. Ndër të tjera, presidenti Meta akuzohet për shkelje të rëndë të Kushtetutës dhe deputetëve u kërkohet që të votojnë “pro” për shkarkimin e tij.
“Në emër të Komisionit Hetimor për hetimin e shkeljeve të rënda të presidentit Ilir Meta, të paraqes raportin e këtij komisioni. Deputetët e Kuvendit kanë paraqitur propozimin për shkarkimin e presidentit Ilir Meta. Komisioni shqyrtoi në dy mbledhje kërkesën e deputetëve.
Komisioni Hetimor, pasi konstatoi se kërkesa e deputetëve plotëson kërkesat ligjore, vendosi ngritjen e një Komisioni parlamentar. Kuvendi vendosi ngritjen e komisionit Hetimor të përbërë nga nëntë anëtarë.
Objekti ishte hetimi i akteve të kryera të presidentit Ilir Meta gjatë fushatës, si dhe ditën e heshtjes zgjedhore, që përbëjnë shkelje të kushtetutës. Prishjen e ekuilibrit publik, dëmtimin e imazhit të vendit dhe marrëdhëniet me partnerët strategjikë të Shqipërisë,” u shpreh mes të tjerash Hyseni.
Sot do të merret dhe vendimi përfundimtar për shkarkimin e presidentit Ilir Meta, i cili në rast se shkarkohet, do të jetë i pari i tillë në historinë e shtetit shqiptar.
