Ambasada e Shteteve të Bashkuara të Amerikës, ka reaguar lidhur me raportin përfundimtar të OSBE/ODIHR, që u publikua dy ditë më parë lidhur me zgjedhjet parlamentare të 25 prillit në Shqipëri.
Me anë të një postimi në rrjetet sociale, ambasada ka theksuar se nxit të gjitha institucionet përkatëse që të shqyrtojnë raportin përfundimtar dhe rekomandimet e tij, për të përmirësuar më tej zgjedhjet në Shqipëri.
“Ne kemi mbajtur shënim Raportin Përfundimtar të ODIHR mbi zgjedhjet parlamentare të 25 prillit, i cili ndërtohet mbi bazën e raportit paraprak të 26 prillit. Nxisim të gjitha institucionet përkatëse që të shqyrtojnë raportin përfundimtar dhe rekomandimet e tij për të përmirësuar më tej zgjedhjet në Shqipëri.”, shkruan ambasada e Shteteve të Bashkuara të Amerikës.
Kujtojmë se delegacioni i BE-së theksoi se ky raport konfirmon se zgjedhjet parlamentare ishin përgjithësisht të organizuara mirë dhe se KQZ mbikëqyri procesin zgjedhor në një mënyrë transparente. Shqetësim, sipas tyre, mbetet keqpërdorimi i burimeve shtetërore si dhe funksioneve zyrtare nga partia në pushtet dhe figura të tjera publike.
Në raport konsiderohet se procesi në ditën e zgjedhjeve ishte i qetë ndërsa qytetarët mund të zgjidhnin mes kandidatëve të cilët mund të bënin fushatë të lirë brenda një kornize ligjore që respekton liritë themelore. Raporti nënvizoi përdorimin e administratës publike nga ana e partisë në pushtet dhe burimeve administrative.
