Kryeministri shqiptar, Edi Rama, duke qenë në Kosovë për të shënuar 25-vjetorin e çlirimit të Kosovës, mbajti një fjalim mbi të ardhmen politike të Kosovës në kontekstin e marrëdhënieve me Serbinë dhe aspiratat e saj evropiane.
Në fjalimin e tij, Rama shprehu shqetësimin se politika e jashtme e Kosovës, e cila trajtohet shpesh si politikë e brendshme për fitime elektorale, po e lë Kosovën me gjithnjë e më pak miq në arenën ndërkombëtare. “Sot jemi në një proces ku thellohet edhe më shumë qasja e politikës së jashtme, si politikë e brendshme. Kjo mund të ketë sukses elektoral, por kjo e lë Kosovën me gjithnjë e më pak miq,” deklaroi Rama.
Ai vuri në dukje se Kosova duhet të dalë nga loja e vazhdueshme diplomatike me Serbinë dhe të përqëndrohet më shumë tek përmbushja e standardeve dhe kërkesave të Bashkimit Evropian. “Nëse Kosova do të dilte nga kjo lojë ‘macja me miun’ me Serbinë, ne jemi këtu për të folur me BE, për të përmbushur detyrimet që kemi ne, si Republikë e Kosovës, në kontekstin e standardeve të BE dhe për t’u afruar me u,” shtoi ai.
Rama gjithashtu theksoi se të ardhmen e Kosovës nuk duhet ta përcaktojë ajo që pëlqen apo jo Serbisë, dhe se përpjekjet e Serbisë për të mos njohur Kosovën nuk duhet të jenë pengesë për Kosovën në rrugën e saj drejt njohjes ndërkombëtare dhe integrimit në BE dhe NATO.
“Nuk jemi kërthiza e botës. Sa herë e kemi besuar këtë, e kemi pësuar shumë. Kosova është shumë e bukur, i ka të gjitha mundësitë dhe nuk ka pse të humbi kohë duke vrapuar rreth vetes së vet,” përfundoi Rama, duke i bërë thirrje Kosovës të ndjekë një rrugë të qartë dhe të vendosur drejt integrimit dhe njohjes ndërkombëtare.
Kujtojmë se Rama nuk nguroi të bashkëpunonte me Vuçiç përmes Ballkanit të Hapur, ndërkohë që Albin Kurti nuk pranoi të ishte pjesë e tij.
