Fatbardh Kadilli me anë të një postimi në rrjetet sociale ka komentuar Qeverinë “Rama 3”.
Në postimin e tij ndërsa ka akuzuar dy ministrat e rinj të Kabinetit si të lidhur me korrupsionin, Kadilli ka shkruar se ndërtimi i Qeverisë së re është një kryetarokraci pa asnjë qëllim. Ai ka shkruar më tej se nga këta emra që kanë dalë nga kabineti i ri qeverisës do të përfitojnë ortakët e pushtetit. Do të shtohen koncensionet dhe PPP-të korruptive. Sipas tij shqiptarët do të vidhen edhe më shumë.
Kadilli thotë se shqiptarët nuk do të kenë më asnjë shpresë për uljen e borxhit, për reduktimin e varfërisë, për vende pune, për një shtet të drejtë.
Postimi i plotë i Fatbardh Kadilli:
KryetaroKracia e Qeverisë Rama 3 – Lëvizja gjithcka, Qëllimi asgjë
Të njëjtat linja korrupsioni, të njëjtët mjeshtra korrupsioni. Ministra përfaqësues të ortakëve të pushtetit që do të firmosin gjithcka të jashtëligjshme që do t’u kërkojë Rana.
Nga këta emra do të përfitojnë ortakët e pushtetit. Do të shtohen koncensionet dhe PPP-të korruptive. Shqiptarët do të vidhen edhe më shumë.
Ministra anonim pa profil dhe qendrim politik, që nuk përfaqësojnë askënd vec idetë e turbullta të Ramës. Ministra që nuk dinë t’i thonë asgjë shqiptareve për hallet e tyre.
Nga kjo Qeveri do të humbin shqiptarët. Asnjë shpresë për uljen e borxhit, për reduktimin e varfërisë, për vende pune, për një shtet të drejtë.
