Qytetarët kanë dalë në protestë për herë të tretë, kundër rritjes së çmimeve për ushqimet e shportës dhe produkte të tjera.
Një nga protestuesit ka thënë se për vite me radhë ka punuar në minierë, ndërsa shtoi se i ka dhënë miliona lekë shtetit shqiptar nga nëntoka. Ai ka treguar se merr vetëm 140 mijë lekë të vjetra pension.
“Sot kam ardhur në këmbë që nga Shkoza, marr vetëm 140 mijë lekë pension. Shohim që të gjithë kanë vila në të katër anët e Shqipërisë, unë nuk kam as një biçikletë. Kam punuar në minierë për vite me radhë, i kam dhënë miliona lekë shtetit shqiptar nga nëntoka. Ti merr 2 milionë lekë zoti kryeministër, kafen e pi me 100 mijë lekë që unë shtyj muajin. Kam kaluar Covid-19 zoti kryeministër, kam paguar miliona, si ia bëra? Ku i gjeta? Kam hyrë në borxh. Kjo sëmundje na mori shumë të moshuar, shumë pensionistë, edhe ne që kemi ngelur, na merr na zhduk, na shfaros të mos jemi me mirë”, ka thënë ai.
Ndërkohë, një tjetër qytetar ka pyetur se përse kryeministri nuk deklaron publikisht minimumin jetik. Ai ka thënë se Rama duhet të përgjigjet për ligjin që po përgatit për oligarkët, ndërsa ka pyetur se përse Autoriteti i Konkurrencës nuk vendosi gjoba për oligarkët e miellit.
“Kryeministri të deklarojë publikisht minimumin jetik. I ka kërkuar kryeministrit shqiptar të nxjerrë kontratat me oligarkët që janë abuzimet më të mëdha. Ai duhet të përgjigjet për ligjin që po përgatit për oligarkët. Autoriteti i Konkurrencës përse nuk u vendosi gjoba oligarkëve të mielli”, ka thënë qytetari.
