Kryeministri Edi Rama ka thënë se prurjet e tepërta të ujërave do të ruhen në Skavicë e nuk do të derdhen. Ai tha se Skavica ka filluar që tan inga puna e me ndihmën e Zotit do të ndërtohet Brenda këtij mandati.
Rama u ndal edhe tek ulja 20% e TVSH-së, për çmimin e energjisë dhe u shpreh se kjo nuk do të ndryshonte asgjë për konsumatorët. Edhe pse disa vende europiane e kanë përdorur si praktikë, sipas Ramës, ato kanë të tjera specifika.
“Për ça arsye po e ndërtojmë Skavicën. Ajo do të na japë mundësinë e prurjet mos t’i derdhim, por t’i mbajmë rezervë. Nëse do të kemi atë, do të bëjmë një lojë tjetër, që do të kemi fuqinë që të diktojmë ne se kur dalin në treg për të shitur, dhe jo pamundësia për ta mbajtur. O do e derdhim, ose do e shesim. Skavica që ka filluar tani nga puna dhe do të ndërtohet brenda këtij mandati, me ndihmën e Zotit, se ndodhin gjëra që janë rrugës, do të na japë mundësi që të ruajmë rezerva. Ujë mund të kesh, por po nuk pate ku ta rezervosh, ça do bësh? Do rrish në dush gjithë ditën apo do e lësh që të ikë. S’ka prova që këto ulje sjellin benefite te konsumatori. Siç ndodhi te imputet bujqësore. Kush përfituan? Ata që i shesin. Sa i përket Francës, mos bëni ngatërresa, pasi ajo është në pozicion të jetë dhe s’ka problem nga kjo krizë sot. Franca e ka me sustë; hap centralin rrit prodhimin. Gjermania e ka problemin se ka mbyllur centralet nukleare duke u varur më shumë nga gazi që vjen nga Rusia. Këto kanë lidhje me ne, se jemi pjesë e të tërës. Nëse del jashtë, tregu nuk pyet, a quhesh Muhamed Veliu apo Edi Rama!”, deklaroi Rama.
