Sot, më 14 qershor, po zhvillohet protesta e 12-të e organizuar nga Aleanca për Mbrojtjen e Teatrit (AMT) dhe opozita përpara Bashkisë Tiranë, ku kërkohet dorëheqja e kryetarit të Bashkisë, Erion Veliaj. Aktori i njohur Mehdi Malkaj mbajti një fjalim të ashpër ndaj Veliajt, duke e akuzuar për korrupsion dhe abuzim me pushtetin.
“Veliaj është më i madhi i hajdutëve. Hajdut dhe qelbësirë,” tha Malkaj në fjalën e tij. Ai i drejtoi gjithashtu një apel policisë, duke pyetur nëse ata kanë bërë një betim për të mbrojtur popullin dhe atdheun kur kanë veshur uniformën e tyre. “Populli jemi ne dhe ne jemi të shtypurit. Ju jeni me të këqinjtë, me plehrat, me ndyrësirat,” shtoi ai, duke akuzuar policinë se mbrojnë vetëm udhëheqësit dhe jo qytetarët.
Malkaj vazhdoi me akuza të rënda ndaj Veliajt, duke thënë se ai ka shkatërruar dhe vjedhur çdo gjë, madje edhe Malin e Dajtit. “Ku jeni me betimin ju? Ju jeni betuar për neve dhe jo për udhëheqësit. Nuk ka gjëkundi në kushtetutë që do të mbrohet udhëheqësi. Mbrohet atdheu, mbrohet populli,” deklaroi ai.
Aktori e përfundoi fjalimin e tij me një thirrje direkte ndaj Veliajt: “Erion Veliaj, o qelbësira e qelbësirave që flet mbrapa krahëve, hajde more dil këtu. Dil këtu e të llafosemi. Nuk të prek njeri me dorë sepse nuk duan të bëjnë duart pis me një hale si ty. Dil këtu ta shikosh se çfarë ndodh. Qelbësirë.”
