Qeveria ka në vazhdim projektligjin për sigurimin e detyrueshëm të banesave për dëmet nga tërmeti. Ministri i Financave, Ervin Mete, njoftoi se bisedimet me Bankën Botërore po afrohen drejt përfundimit, dhe deri në pranverë pritet të jetë gati një projekt final. Ky projekt do të përcaktojë tarifat e sigurimit të detyrueshëm për qytetarët dhe vlerën maksimale të siguracionit.
Diskutohet nëse tarifa e sigurimit do të ndahet në dy ose katër zona, duke reflektuar rrezikun sizmik dhe vlerën e banesave në secilën prej tyre. Ministri shprehu besimin se brenda tremujorit të parë të vitit do të jetë gati një projekt i përfunduar. Sipas projektligjit, banesat duhet të sigurohen çdo vit, dhe për subjektet që nuk paguajnë, do të aplikohen masa duke ndaluar shërbimet në platformën e-albania.
Mete theksoi se do të ketë një rishikim të çmimeve të pronave të paluajtshme në bregdet dhe mendohet të shtrohet një koeficient amortizimi për vjetërsinë e ndërtesave, duke zbutur çmimin e referencës për çdo vit. Në rastin e ndërtesave me moshë të lartë, çmimi pritet të zbresë me 1% për çdo vit vjetërsie.
Për skemën e pensioneve, Mete tha se do të priten rezultatet e censit nga INSTAT për të përcaktuar ndërhyrjet e nevojshme.
