Këtë të martë është miratuar Akti Normativ pë Buxhetin, i cili i akordon 400 milion euro ndërtimit të portit të ri në Durrës. Deputetja e PD-së, Jorida Tabaku, shkruan se Akti lidhet me një projekt që një vit e katër muaj më parë qeveria e mohoi për 14 orë rresht që do ndërtohet me taksat e shqiptarëve.
Sipas deputetes do të paguhen 400 milionë euro nga taksat e shqiptarëve për Portin e Durrësit, ndërkohëhë që porti ekzistues iu dha “investitorit strategjitk”, Mohamed Al Alabbar, për të ndërtuar Dubain e tij të vogël në vendin tonë. Qeveria Rama jo vetëm i fali tokën e portit dhe e përjashtoi nga taksat, por kusuri i shqiptarëve është të paguajnë edhe 400 mln euro për një port të ri, për të cilin kryeministri Rama shprehej se do ndërtohej me PPP.
“Ditën e sotme, shpejt e shpejt, u miratua Akti Normativ për Buxhetin që ka ardhur as dy muaj pas fillimit të vitit.
Nxitimi i qeverisë për këtë Akt lidhet me një projekt që një vit e katër muaj më parë qeveria e mohoi për 14 orë rresht që do ndërtohet me taksat e shqiptarëve.
Porti i Durrësit që u shkatërrua për t’i dhënë jetë një projekti me shumë pikëpyetje dhe që ndoqi një rrugë ligjore me shumë pikëpyetje, shkatërroi Portin e Durrësit.
Janë 400 mln euro që do të paguhen nga taksat e shqiptarëve për një Port që ekzistonte por që qeveria vendosi ta shkatërrojë për ta ndërtuar diku gjetkë. Në fillim premtoi se do e ndërtonte me PPP nga një garë ndërkombëtare ku ishin thërritur kompanitë më prestigjoze të huaja. Por, as dy vjet pas këtij premtimi dhe nga xhepat e shqiptarëve merren 90 mln euro, nga taksat e rritura, për të ndërtuar një port që ekzistonte dhe që fitonte edhe fonde nga BE.
Kësaj shume, një kontabilist i zoti që i mungon sot qeverisë, do t’i shtonte edhe koston e një gjyqi në Arbitrazh që na rrezikon disa miliona të tjerë për një kontratë që kjo mazhorancë e miratoi me votat e saj në mandatin e saj të dytë.
Kjo është e gjithë arsyeja e rishikimit të buxhetit, që në dhjetor ishte buxheti më i madh në vend dhe i shqiptarëve, ndërsa sot na rezulton si përherë buxheti i një pakice që fiton nga taksat e shumicës!”, shkruan Tabaku.
