“Po digjesha nga dëshira për ta thënë”/ Camilla rrëfen sekretin e sëmundjes së Charles

Mbretëresha Camilla ka rrëfyer për herë të parë vështirësinë emocionale që përjetoi kur iu desh të mbante të fshehtë diagnozën e kancerit të bashkëshortit të saj, Mbretit Charles, në ditët përpara se lajmi të bëhej publik.

Në një film të publikuar me rastin e 30-vjetorit të organizatës që mbështet pacientët me kancer, Maggie’s, Camilla kujtoi vizitën e saj në një prej qendrave të organizatës më 31 janar 2024. Në atë moment, Charles ishte diagnostikuar tashmë me kancer, por publiku ende nuk dinte asgjë.

“Po digjesha nga dëshira për ta nxjerrë nga vetja, por sigurisht që nuk mundesha”, rrëfeu Camilla gjatë bisedës me drejtuesen e Maggie’s, Dame Laura Lee.

Në atë periudhë, Charles po rikuperohej pas trajtimit për zmadhimin e prostatës, ndërsa mjekët kishin zbuluar se ai vuante nga një formë e papërcaktuar kanceri. Buckingham Palace do ta njoftonte zyrtarisht diagnozën vetëm pesë ditë më vonë, më 5 shkurt 2024.

Për Camillën, vizita në qendrën e kancerit mori një dimension krejtësisht tjetër. Përballë saj ndodheshin pacientë dhe familjarë që po kalonin një përvojë të ngjashme me atë që, në fshehtësi, po përjetonte edhe familja mbretërore.

“Pothuajse thashë diçka, por e kuptova se nuk ishte momenti”, tregoi ajo.

Mbretëresha tha se kjo përvojë e bëri të kuptonte edhe më shumë rëndësinë që kanë qendrat e mbështetjes për personat e diagnostikuar me kancer dhe familjet e tyre, veçanërisht në aspektin psikologjik dhe emocional.

Duke folur për mënyrën se si Charles reagoi pas diagnozës, Camilla tregoi se sëmundja nuk e bëri atë të hiqte dorë nga përgjegjësitë dhe angazhimet e tij publike.

“Asgjë nuk e ndaloi. Ai thjesht tha: ‘Kjo është mënyra ime. Kështu do ta përballoj’”, rrëfeu mbretëresha.

Charles iu rikthye angazhimeve publike në prill 2024, më pak se tre muaj pasi kishte nisur trajtimin.

Në rrëfimin e saj, Camilla theksoi gjithashtu nevojën që pacientët me kancer dhe familjet e tyre të mos përballen vetëm me barrën emocionale të sëmundjes. Ajo bëri thirrje që çdo spital të ketë një qendër të tillë mbështetjeje, ku pacientët dhe të afërmit e tyre të mund të marrin ndihmën psikologjike dhe emocionale që u nevojitet.