Autoritetet britanike po përpiqen të dëbojnë për herë të tretë Ronaldo Zanin, një shtetas shqiptar 26-vjeçar, i cili është rikthyer në mënyrë të paligjshme në Mbretërinë e Bashkuar pas dy dëbimeve të mëparshme, për shkak të përfshirjes së tij në aktivitet kriminal.
Zani u deportua për herë të parë në vitin 2019, pasi u arrestua duke shitur kokainë. Pavarësisht këtij dëbimi, ai u rikthye vetëm pak muaj më vonë, duke iu rikthyer menjëherë aktivitetit kriminal. Sipas dëshmive, ai u tha klientëve: “Jam kthyer në punë”.
Ai u kap sërish me lëndë narkotike dhe gjatë hetimeve deklaroi se ishte detyruar të angazhohej në trafik droge për të shlyer një borxh prej 15 mijë paundësh ndaj një grupi kontrabandistësh që e kishte ndihmuar të hynte ilegalisht në vend.
Në maj të vitit 2021, Zani u dëbua për herë të dytë pas një dënimi me tre vite burg. Megjithatë, më 13 shkurt të këtij viti, ai u ndalua sërish nga policia britanike, kësaj here në qytetin Bournemouth, ndërsa po drejtonte një automjet tip Mercedes.
Gjatë kontrollit, oficerët zbuluan 1,935 paund para cash dhe rreth 24.75 gramë kokainë, me një vlerë të vlerësuar në rrugë deri në 2,500 paund.
Zani pranoi se kishte hyrë përsëri në Britani ilegalisht “disa muaj më parë”, i fshehur në pjesën e pasme të një kamioni. Ai pretendoi se fillimisht kishte punuar në mënyrë të ndershme, por për shkak të pagave të ulëta nuk kishte mundësi të shlyente borxhin ndaj kontrabandistëve, duke u detyruar kështu të kthehej në shpërndarjen e drogës.
Aktualisht ai është dënuar me 4 vjet burg dhe pritet që, pas përfundimit të dënimit, të deportohet sërish nga autoritetet britanike.
