Partia Demokratike ka ndarë në rrjetet sociale videon që sipas tyre tregon si janë përdorur administrata dhe legalizimet për qëllime elektorale në masakrën zgjedhore të 25 prillit. Videon e ka ppstuar fillimisht Sekretari i Përgjithshëm i PD, Gazment Bardhi, i cili shkruan se edhe raporti i OSBE e thotë këtë gjë, ndërsa shqiptarët e dinë mirë se pas mashtrimit për legalizime falas, u përballën me dëbimin e dhunshëm nga prona e tyre.
Bardhi thotë se ky krim zgjedhor është një tjetër provë në duart e drejtësisë e cila nuk mund të mos veprojë.
“Këmbëngulja e Artan Lames për t’i cilësuar shqiptarët si mish për top, është një tjetër provë se me urdhër të Edi Ramës, administrata dhe legalizimet janë përdorur për qëllime elektorale në masakrën zgjedhore.
Këtë e thotë edhe raporti përfundimtar i OSBE/ODIHR, këtë e dinë mirë të gjithë shqiptarët që pas mashtrimit për legalizime falas, u përballën me dhunën dhe gazin lotsjellës me të cilin u dëbuan nga pronat e tyre.
Ky krim zgjedhor, si një hallkë në zinxhirin e veprimeve korruptive dhe anti-demokratike, është një tjetër provë në duart e drejtësisë e cila nuk mund të mos veprojë, sidomos kur shkelësit e saj sfidojnë publikisht atë dhe shoqërinë shqiptare me qëndrimet e tyre anti-ligjore”, shkruan Bardhi.
