Në New York është zhvilluar Parada e Shqiptarëve, një ngjarje festive që bashkoi komunitetin shqiptar në SHBA dhe që këtë vit u nderua edhe nga pjesëmarrja e kryebashkiakut Eric Adams.
Kreu i Bashkisë së New York-ut priti përfaqësues të komunitetit në rezidencën zyrtare Gracie Mansion, ku u shfaq i veshur me një plis tradicional dhe një shall kuq e zi.
Gjatë fjalës së tij përshëndetëse, Adams u shpreh me humor: “Duhet ta doni Shqipërinë më shumë se Amerikën,” duke shtuar se edhe djali i tij është i dashuruar me vendin tonë dhe pret me padurim ta vizitojë.
Në një deklaratë të ngrohtë, ai theksoi rëndësinë e festës dhe prezencës së komunitetit shqiptar në jetën publike të qytetit: “Çfarë dite, çfarë dite. Kur mendoni për këtë, vëllezërit dhe motrat tona nga Shqipëria, nga Kosova, nga Mali i Zi dhe Maqedonia e Veriut, thotë shumë për ne të jemi këtu në Gracie Mansion dhe të kemi paradën tuaj, një paradë që do të thotë kaq shumë.
Një paradë është simbolike në këtë vend si një mënyrë për të deklaruar se ju jeni pjesë e gjithçkaje në të cilën besojmë, dhe bukuria e saj është se kur marshoni në njërën nga rrugët tona kryesore, tregoni dhe shfaqni flamurin tuaj, flamurin tuaj kuq e zi me atë simbol të rëndësishëm mbi të. Ajo thotë se nuk keni pse ta braktisni vendin tuaj për të dashur vendin tuaj të adoptuar, Amerikën. Ju jeni në gjendje t’i keni të dyja.”
Duke lavdëruar kontributin e komunitetit shqiptar në qytet, Adams tha: “Ju sillni këtu besim, ju sillni këtu kulturën tuaj, ju sillni këtu etikën tuaj të punës, ju sillni këtu sigurinë tuaj publike, burrat dhe gratë që jo vetëm zbukurojnë simbolin tuaj kuq e zi, por ata zbukurojnë edhe uniformën e policisë. Ata na mbajnë të sigurt çdo ditë dhe dua t’i falënderoj që janë këtu për të festuar me ne.”
Ai shtoi se ishte i vendosur për ta bërë këtë paradë realitet: “Kur më pyetën nëse mund të organizoni një paradë, thashë po. Do ta bëjmë të ndodhë dhe do të sigurohemi që të jetë një nga paradat më të mira që do të shihni.”
Duke vënë në dukje numrin e madh të shqiptarëve në qytet, Adams theksoi: “200,000 shqiptarë të fortë jetojnë në New York City. Numri më i madh i shqiptarëve në këtë vend është pikërisht këtu në New York City. Nga Shqipëria e Vogël në Bronx deri te Shqipëria e Vogël në Queens, ju jeni rritur dhe keni një pikëmbështetje të fortë, dhe forca juaj politike është e pashembullt. Ju them, faleminderit që e bëtë këtë qytet atë që është.”
Në fund, Adams u ndal edhe te dëshira e tij për të vizituar Shqipërinë: “Mezi pres të shkoj në Shqipëri dhe të shijoj lumenjtë, detet, malet e bukura dhe gjithçka që keni për të ofruar. Dhe kështu ju falënderoj shumë, dhe mezi presim të nderojmë dhe të lartësojmë ata që po nderojmë sot. Faleminderit. Gëzuar Ditën.”
Parada shqiptare në New York u kthye kështu në një manifestim të madh të krenarisë kombëtare dhe të integrimit të suksesshëm të diasporës shqiptare në jetën e qytetit më të madh amerikan.
