Drejtuesi Politik i Partisë Demokratike për Qarkun e Tiranës, Belind Kelliçi, u paraqit sot në SPAK lidhur me kallëzimet e bëra për skandalin “5D” që ka në epiqendër kryebashkiakun Erion Veliaj. Ndërsa prokurorët po shqyrtojnë me imtësi provat që zbulojnë përfshirjen direkte të Veliajt, duket se ora e drejtësisë po afron për kryebashkiakun më të korruptuar në historinë e Tiranës.
Dosja e SPAK për “5D Konstruksion” konsiderohet ndër më të mëdhatë në historinë e administratës vendore shqiptare. Përgjimet zbuluan se si nën ‘bekimin’ e Veliajt, drejtorët e tij më të besuar ngritën një skemë grabitqare për të vjedhur miliona euro nga taksat e qytetarëve. “Është aks. pronari jon… Lali eri… e kta”, dëshmonin punonjësit e kompanisë në përgjimet e SPAK-ut.
Por “5D” ishte vetëm maja e ajsbergut. Veliaj, i njohur ndryshe si “Lali Euro”, kishte ngritur një oktapod të vërtetë korruptiv në Bashkinë e Tiranë, me kompaninë e vëllait të tij, Gogel, përmes një skeme të thjeshtë: çdo kompani që merr tender nga bashkia, detyrohet të blejë shërbime marketingu nga “Gogel”.
Nga një biznes modest me fitim 10 milionë lekë, “Gogel” u transformua në një gjigant me xhiro 3.4 miliardë lekë dhe fitime që arritën 520 milionë lekë, menjëherë pasi Erioni mori pushtetin.
Lidhjet me oligarkët si Gentian Sula vetëm sa e thellojnë më tej batakun e korrupsionit. Sula, përfitues i dhjetëra tenderave nga Bashkia, i ka “dhuruar” Veliajt një vilë luksoze në “Kodra e Diellit 2” dhe i ka vënë në dispozicion pa qira një godinë në zemër të Tiranës bashkëshortes së tij.
Megaskandali i inceneratorit të Tiranës ka nxjerrë në dritë gjithashtu lidhje të rrezikshme me kompaninë shtetërore iraniane “Mapna Group”, duke ngritur alarmin edhe për sigurinë kombëtare. Veliaj, në një manovër tipike për të shmangur përgjegjësinë, refuzoi të marrë drejtimin e Njësisë së Zbatimit të Projektit, ndërsa vazhdoi të derdhë miliona euro në këtë gropë të zezë korrupsioni.
SPAK ka nisur një hetim të thelluar pasuror që përfshin jo vetëm Veliajn, por edhe bashkëshorten Ajola Xoxa, vëllain Arbër dhe nënën Shqiponjë Veliaj. Hetimet po zbulojnë një rrjet të tërë kompanish dhe transaksionesh të dyshimta që shtrihen nga marketingu tek arti e kultura.
Rrethi po mbyllet për “Lali Euron”. Nën drejtimin e tij, Tirana është shndërruar në një qytet të pajetueshëm, mbytur nga betoni i lejeve të paligjshme të ndërtimit, ndotja alarmante e ajrit dhe kaosi në trafik. Por më e rënda, xhepat e qytetarëve janë vjedhur sistematikisht përmes një rrjeti korruptiv që përfshin familjarë, oligarkë e drejtorë të korruptuar.
Me thellimin e hetimeve të SPAK, duket se Lali Euros i ka ardhur, më në fund, ora e përballjes me drejtësinë. Ashtu si drejtorët e tij besnikë që sot ndodhen pas hekurave, edhe Veliaj do të duhet të japë llogari për çdo qindarkë të vjedhur nga taksapaguesit e Tiranës.
/gazetareforma.com
