Kreu i Autoritetit të Komunikimeve Elektronike dhe Postare, Ilir Zela, ka dhënë dorëheqjen.
Zela i ka dërguar një letër kreut të Kuvendit, Gramoz Ruçi, ku sqaron arsyet e largimit.
Në letrën drejtuar Ruçit, Zela thotë se i ka shërbyer me përkushtim publikut dhe nuk ka lejuar që interesat publike të nëpërkëmben nga presioni i interesave monopoliste.
Në letrën e dorëheqjes, kreu i AKEP njofton se ka dhënë dorëheqjen edhe si anëtar i Këshillit Mbikëqyrës të AKEP.
“Prej datës, 22 nëntor 2017 kam patur privilegjin që me besimin dhe mbështetjen e plotë të Kuvendit të Republikës së Shqipërisë ti shërbej publikut në detyrën e Kryetarit të Këshillit Drejtues të Autoritetit të Komunikimeve Elektronike dhe Postare (AKEP). Me paqen e njeriut që i ka shërbyer publikut me përkushtim shembullor, në këtë detyrë apo në angazhime publike të mëhershme, pa lejuar në asnjë moment që interesat publike të nëpërkemben nga presioni i pandërprerë i interesave monopoliste, ju njoftoj doreheqjen time nga detyra e Kryetarit të Këshillit Drejtues të AKEP”, shkruan Zela në letrën e dorëheqjes së tij.
Ilir Zela ka mbajtur postin e kreut të AKEP, për 2 vite.
Në vendin e Zelës, Këshilli i Ministrave ka propozuar Tomi Frashërin.
