Një ngjarje e rëndë ndodhi pak ditë më parë në fshatin Sulaj të Fierit. Një 23-vjeçar nga Tropoja u gjet i pajetë në vendin e quajtur “Kthesa e Hamilit” në fshatin Sulaj të Fierit.
I riu është identifikuar si Florian Selimi. Mësohet se viktima ishte nga Tropoja dhe kishte ardhur vitet e fundit në fshatin Sulaj të Fierit.
Ditën e sotme gjykata e Fierit vendosi t’i lërë në “burg pa afat” dy të rinjtë që vranë me thikë Florian Selimin. Asnjëri nga dy të rinjtë nuk e kanë pranuar vrasjen e 23-vjeçarit.
Sipas Policisë, vrasja është kryer më datë 11 gusht, ndërsa trupi i pajetë i viktimës është gjetur mëngjesin e 12 gushtit në një kanal. Vrasja e rëndë ndodhi për motive të dobëta.
Viktima kishte pasur probleme me makinën dhe kishte ndaluar në anë të rrugës për ta kontrolluar, ku kishte hequr njërën nga gomat dhe kishte hapur kafanon.
Babai i 23-vjeçarit Selimi, mësohet t’i ketë thënë hetuesit se në orët e vona të natës, ai ka marrë një telefonatë nga i biri, i cili i kishte kërkuar ndihmë për të rregulluar makinën.
Floriani i ka treguar të atit se mjeti ka shfaqur një defekt dhe e ka lënë në rrugë. Pas kësaj, ata nuk janë lidhur dot më në telefon me njëri-tjetrin edhe pse i ati kishte pritur ta merrte i biri.
Duke qenë se 23-vjeçari nuk po i hapte as telefonin më të atit, ky i fundit kishte dalë për ta kërkuar.
Vetëm në mëngjs ai ka gjetur trupin e pajetë të djalit të tij, ku ka parë edhe mjetin në anë të rrugës.
