Kryeministri Edi Rama ka folur rreth çështjes së vaksinimit të studentëve, ndërkohë që disa prej tyre nuk u lejuan të futen në auditorë ditën e parë të fillimit të vitit akademik.
I ftuar në emisionin “Now” në Euronews, Rama tha se ka shumë interferenca që përhapin teori konspiracioni. Ai shtoi se ky është një proces që duhet shpjeguar më qetësi.
“Unë mendoj që nuk duhet të kalojmë në ekstrem që në momentin e parë, është një proces. Ka shumë interferenca për të folur shumë indicidë që përhapin teori konsipracioni dhe lajmesh. Flas për ata që flasin për konspiracionin e vaksinës, faktin që vaksina është e rrezikshme njerëz që nuk janë shkencëtarë. Në këtë botë që dominohet nga fluksi i jashtëzakonshëm i lajmeve, ka plot nga këto duke krijuar pasiguri dhe shqetësime. Përgjithësisht ndiqen më shumë se ato që janë. Është proces që duhet shpjeguar me qetësi”, ka thënë Rama.
I pyetur se çfarë do të ndodhë me studentët e vaksinuar, Rama tha se ata kanë nevojë për mbështetje dhe duhet provuar në mënyrë të butë që ata të binden. Ai shtoi se normalisht ata nuk duhet të futen në mësim, por qeveria nuk çon forcat në universitet, pasi ato janë autonome.
“Studentët e pavaksinuar nuk futen në auditor? Normalisht ata nuk duhet të marrin pjesë në mësim por kjo është një cështje e autoriteteve sepse qeveria nuk çon forcat që të nxjerrë stuidentët jashtë, universitet janë autonome, rektorët e dinë që ky proces duhet të zhvillohet mirë. Ministria e Arsimit do të vazhdojë që të nxitë studentët që të vaksinohen. Në cdo holl të universitetit ka ambiente ku do të vaksinohen”, u shpreh Rama.
