Pas një “lufte” të gjatë publike, politike dhe gjyqësore mësohet se sot mbahen zgjedhjet për kreun e ri të Akademisë së Shkencave me një kandidat të vetëm për këtë post, i cili është kreu aktual Skëndër Gjinushi. Një vendim krejt i paparitur ky pasi nuk u njoftuan as mediat e as publiku. Duket se pas miratimit të ligjit që i mundëson rizgjedhjen në krye të Akademisë së Shencave, Skëndër Gjinushi, ka bërë gati të gjitha kushtet për t’u rikonfirmuar sërish në detyrë, ndonëse me procedura të dyshimta dhe pa transparencë për publikun. Këto zgjedhje si tenderat pa garë të bëra nga qeveria, ku gjithçka është kopsitur nën heshtje, pa rivalë dhe fushatë brenda ose jashtë Akademisë së Shkencave, me opinionin shkencor, ku pjesëmarrësit në garë të shpalosnin platformat dhe idetë e tyre, i jep përfundimisht një mandat të dytë Gjinushit.
Burime për BalkanËeb bëjnë me dije se rreth 15 akademikë kanë votuar paraprakisht me zarf në një procedurë krejt të dyshimtë, ndërkohë që votat e tyre janë administruar nga një komision teknik AD Hoc dhe jo nga një komision votimi, që duhej të ishte ngritur për këtë rast.
Ndërkohë mësohet se i vetmi zë kundër kësaj procedure të ndjekur është akademiku Artan Fuga, i cili që prej përgatitjes së ligjit që i jep mundësinë rikandidimit të kryetarit aktual, ka reaguar ashpër.
Aktualisht, zgjedhjet po zhvillohen pa praninë e mediave, në një qark të mbyllur që lë vend për shumë dyshime. Kujtojmë se projektligji që parashikon ndryshime në ligjin e 2019-ës “Për Akademinë e Shkencave” u prit me kritika nga opozita dhe shumë akademikë, për formulimin që lidhej me mandatin e kryetarit të ASH-së. Me këto ndryshime iu hap rrugë rikonfirmimit të Gjinushit në krye të Akademisë së Shkencave.
