Kreu i Partisë së Lirisë, Ilir Meta përmes një konference për mediat ka reaguar në lidhje me vendimin e Sekretariatit të Etikës, për përjashtimin me 20 ditë të deputetit Ervin Salianji dhe me 10 ditë për 18 deputetë të tjerë të opozitës, duke e konsideruar një agresion ndaj opozitës.
Në konferencën për shtyp, Meta u shpreh se ndëshkimet ndaj deputetëve opozitarë, bëhet për shkak se mazhoranca ka tmerr nga fjala e lirë dhe llogaridhënia që kërkon opozita.
“Nuk mund të flas në emër të të gjithë opozitës. Opozita është në një dinamikë të vazhdueshme. Ne, ditën e enjte do të mbledhim Komitetin Drejtues Kombëtar të Partisë së Lirisë dhe do të shprehim vlerësimet tona lidhur me situatën në vend, por edhe me qasjen që opozita duhet të ketë për situatën aktuale. Aksioni opozitar nuk ka ndalur asgjëkundi. Ashpërsimi i masave ndëshkuese tërësisht të papranueshme dhe që tregojnë një degradim të këtij regjimi hibrid, regjimi autokratik, regjimi që ka tmerr nga fjala e lirë e opozitës, ka tmerr nga llogaridhënia, tregojnë se opozita ka qenë dhe është në aksion të vazhdueshëm, ashtu siç është nën agresion të vazhdueshëm, që duhet ta përballojë me një qasje më gjithëpërfshirëse”, u shpreh Meta.
Deputetët e opozitës janë përjashtuar pasi vazhdimisht në seancat plenare dhe në Komisionet e Kuvendit kanë shkaktuar kaos dhe rrëmujë duke bllokuar kështu punimet brenda Parlamentit shqiptar.
