Pas më shumë se një muaji klubet e ekipeve të Superiores mbyllën bojkotin për tu rikthyer në fushë për sezonin e ri futbollistik 2020-2021.
Kjo ishte java e parë e ndeshjeve zyratre të Kategorisë Superiore, por gjërat nuk duken mirë për ekipet dhe futbollistët.
I gjithë problemi i momentit qendron te gjendja e stadiumeve në vendin tonë dhe kaosi që është krijuar me zhvillimin e ndeshjeve në stadiume që nuk kanë kapacitetin dhe cilësinë e duhur për të zhvilluar ndeshje të Kategorisë Superiore dhe të Parë.
Problematike është situata për Kukësin, Tiranën dhe Partizanin pasi nuk kanë ku të zhvillojnë ndeshjet e radhës. Në Kukës stadiumi po rindërtohet dhe kjo nuk lejon zhvillimin e ndeshjeve në ambientet e tij. Në stadiumin “Selman Stërmasi” nuk ka shumë kohë që është mbjellë tapeti i ri dhe barit i duhet më shumë se një muaj kohë për t’u bërë gati.
Në stadiumin “Elbasan Arena” FSHF ka vendosur që të rimbjellë barin dhe fusha do të jetë gati vetëm për ndeshjen miqësore mes Shqipërisë dhe Kosovës që do të luhet më 11 nëntor.
Ndërkohë stadiumi më i ri në vend dhe më me shumë investime “Air Albania” po qëndron i mbyllur dhe do të presë vetëm Kombëtaren për dy ndeshjet e radhës, përballë Kazakistanit dhe Bjellorusisë më 15 dhe 18 nëntor. Kjo pasi gjendja e tapetit nuk është e mirë dhe sapo të mbarojnë këto dy ndeshje stadiumi do të qendrojë i mbyllur për tre muaj.
Kjo është situata e stadiumeve kryesore në vend dhe që presin ekipet kryesore të Kategorisë Superiore.Për këtë arsye Kukësi, Tirana dhe Partizani janë të detyruara të “shtegtojnë” për në stadiume të tjera shumë larg Tiranës apo Kukësit.
Në ndeshjen e parë të kësaj jave Tirana u detyrua të priste Kukësin në Korçë. Kampionët në fuqi janë sërish pritës edhe në këtë javë, teksa kësaj here kanë zgjedhur stadiumin e Kamzës, duke qenë se Kastrioti luan në transfertë ndaj Laçit. Ditën e djeshme Partizani u përball me Kastriotin dhe u detyrua që të luante në stadiumin e Kamzës.
Ndërkohë në të njëjtën situatë ndodhet edhe Kukësi, i cili ka zgjedhur “Loro Boriçin”, për përballjen e javës së dytë ndaj Partizanit.Për ndeshjen e radhës ndaj Teutës që do të luhet më 8 nëntor, Tirana ka zgjedhur stadiumin “Gjorgji Kyçyku” në Pogradec.
Ende nuk dihet sesa do të zgjasë kjo situatë, por ka shumë pikëpyetje dhe paqartësi se pse po ndodhin këto probleme tani që sapo ka filluar sezoni i ri dhe ekipet përveçse nuk kanë ku të luajnë nuk kanë as tifozat e tyre për t’i përkrahur e mbështetur ashtu siq duhet.
