Protestuesit kërkojnë ndërhyrjen e kryeministrit Rama për të marrë apartamentet e paguara ndërtuesve qysh në vitin 2016. Banorët e pallatit në ndërtim nga dy biznesmenët Sino Llanaj dhe Albert Allmuça janë ngritur këtë të shtunë në protestë, për shkak se kanë blerë hyrjet e tyre dhe ende nuk janë futur brenda. Ata thonë se prej dy vitesh punimet në pallat kanë ngecur, pasi dy pronarët janë futur në konflikt me njëri-tjetrin.
Banorët e pallatit në rrugën “Ndre Mjeda” në Tiranë, edhe pse biznesmenët Albert Allmuça dhe Sino Llanaj gjenden pas hekurave, kërkkojnë ndihmën e kryeministrit Rama.
“Ne i kemi bërë thirrje kryeministrit të ndërhyjë për të drejtat tona. Vërtet ne kemi blerë në privat, por ky privat e ka marrë lejen në shtet. Jemi 120 familje, por ka nga ato që kanë pasur miq, që janë futur nga pronari tjetër”, tha një banor për mediat.
Banorët kërkojnë vazhdimin e punimeve në apartamentet dhe dyqanet që ata kanë parapaguar, pasi kontratat janë të rregullta dhe ligjore. Pas shumë ditëve qendresë një pjesë e banorëve janë lejuar për herë të parë që të hyjnë në banesat që kanë paguar, dhe që ende nuk kanë përfunduar punimet.
“Deri në njëfarë periudhe ne jemi lejuar që të hyjmë në banesat tona dhe të vazhdojmë vetë punimet, në momentin që hyri sherri mes tyre ne nuk jemi lejuar që të hyjmë aty. Ne figurojmë të panjohur për njërin nga biznesmenët, kemi firmosur një kontratë prenotimi që në vitin 2016, dhe që duhej të përfundonte në vitin 2019, ndërsa tani ndërtimi është shtyrë deri në vitin 2022”, shprehet një prej banorëve.
Qytetarët këmbëngulin se në këtë pallat janë ndjekur dy standarde, pasi një pjesë e banorëve janë futur në banesa, edhe pse godina ende nuk është kolauduar, siç e parashikon ligji. Sipas qytetarëve, banorët që kanë parapaguar te Sino Llanaj nuk lejohen të hyjnë në banesë, dhe kjo bëhet në shkelje të hapur me ligjin.
“Ndërtimet e Sinos janë ndërprerë, objekti që kemi përballë është ende kantier ndërtimi, ndërkohë që po të kthesh kamerën sheh që aty ka banorë që jetojnë. Është shkelje e drejtpërdrejtë e ligjit, ai punëson kompani të fortësh dhe nuk na lejon që të hyjmë brenda, për banorët nuk mund të përdoret standard u dyfishtë. Ne kërkojmë që të mbarojnë sa më parë punimet, pastaj ata çfarë të duan të bëjnë në gjyqe, ti ndajnë si të duan paratë. Ne duhet të kishim marrë banesat që në Tetor të 2019-tës, dhe e kanë çuar tani në 2022shin. Ne na kushton kjo shtyrje pasi ne jemi me qira”, shprehen banorët.
/Gazetareforma.com/
