Kujtonte se puna e tij ishte vetëm t’u vinte gjoba lokaleve për muzikën, por BE i kërkon llogari pse nuk e ka ruajtur mjedisin. Kapitulli 27, që lidhet me cështjet mjedisore, po bëhet i detyrueshëm për Shqipërinë, ndërkohë që Ministria e Blendi Klosit ka dështuar të luftojë krimi mjedisor.
“Dështimi dhe menaxhimi i mbetjeve lidhet me krimin mjedisor, krimin e organizuar dhe korrupsionin. Kjo është pik kryesore ku BE do të fokusohet nëpërmjet investimeve të saj dhe planit ekonomik”, u shpreh gjatë një takimi për këtë shqetësim, Ambasadori i BE-së, Luigi Soreca.
I gjendur ngushtë, ministri Klosi tha se ka mangësi në ndëshkimin ndotësve.
“Mbetja urbane është një krim mjedisor e kemi futur si krim mjedisor në ndryshimet e kodit penal por a ka vepruar ky në realitet? Ky padyshim që është një mangësi për të cilën ne duhet të diskutojmë. Ne na duhet shumë që investimet e reja në turizmin, dhe sektorët e ri të zbatohen në përputhje me objektivat mjedisore të BE”, tha Klosi.
Përmbushja e kapitullit të 27 që trajton çështjet mjedisore në Shqipëri është pika kryesore ku duhet të përparojë vendi drejt integrimit në Bashkimin Evropian. Gjatë diskutimit të zhvilluar mes ministrit të Turizmit dhe Mjedisit, Blendi Klosi, ambasadorit të BE, Luigi Soreca dhe ambasadores së Suedisë, Suesise Hastad, theksi u vendos tek ngritja e sistemeve të integruara për trajtimin dhe riciklimin e mbetjeve.
“Kapitulli 27 së shpejti do të bëhet detyrim për Shqipërinë. Është më i vështirë për tu investuar, pasi kërkon investime kapitale, ndryshim politikash, zbatim ligji në terren si dhe kulturë më të madhe. Duhen 500 milionë euro investime për të zbatuar këto objektiva deri në vitin 2032”.
Ndërsa Ambasadorja suedeze Hastad tha se Shqipëria duhet të përmbushë standardet e BE për mbetjet. Ajo i vuri në dyshim edhe shifrat e ofruara nga ministri Klosi.
“Menaxhimi i mbetjeve është një nga sfidat e mëdha për Shqipërinë, në përmbushjeve të standardeve të BE. Në Suedi ne riciklojmë 98% të mbetjeve tona, këtu arrin deri në 17% nuk është pak nuk është keq por nuk e di nëse është e sakta kjo, por e vura re diku”, deklaroi ambasadorja e Suedisë Hastad.
Trajtimi i integruar i mbetjeve është një nga projektet ku do të fokusohen fondet që BE ka vënë në dispozicion të Ballkanit Perëndimor. Por Shqipëria nuk mund të bëhet pjesë e tyre, për shkak të dështimit që e ka emrin Blendi Klosi
