Ministri i Brendshëm, Taulant Balla, gjatë takimit me strukturat drejtuese të Policisë Vendore të Korçës, theksoi rëndësinë e përmirësimit të kushteve të shërbimit për të gjithë punonjësit e policisë.
Në fjalën e tij, Ministri Balla bëri një deklaratë lidhur me problematikën e banimit për uniformat blu, veçanërisht për ata që shërbejnë në qytete të largëta nga vendbanimi i tyre. Ai vuri në dukje se kjo çështje do të trajtohet menjëherë dhe se në vitin 2023 do të hapen aplikime për banesa, duke filluar me ndërtimin e 100 banesave të para. Kështu, do të sigurohet që punonjësit e policisë të kenë kushte të përshtatshme banimi gjatë shërbimit të tyre.
“Do të kujdesem posaçërisht për rritjen e standardit të jetesës të punonjësve të Policisë dhe përmirësimin e kushteve të shërbimit të çdo punonjësi policie, që nga kushtet financiare deri tek kushtet e strehimit kur shërbejnë jashtë vendbanimit apo krijojnë familje të reja. Pa e harruar që nga sot sistemimin përfundimtar të të gjitha familjeve të policëve të vrarë në krye të detyrës, fëmijët e të cilëve janë fëmijët tanë. Ndaj do të trajtojmë problemin e banimit për ata që shërbejnë në qytete të ndryshme nga qyteti ku kanë familjen dhe gjithashtu do të hapim rrugën e aplikimeve për vitin 2023, duke e nisur me 100 banesat e para, të cilat do t’u jepen familjeve të reja të punonjësve të policisë. Kriteret do të bëhen publike në ditët në vijim në bashkëpunim me Ministrinë e Financave dhe Ekonomisë”, theksoi ministri Balla.
Gjithashtu ministri Balla kërkoi luftë intensive, me fokus krimin e organizuar si u kërkoi forcave të rendit një kujdes të shtuar në komunikimin me qytetarët, duke i konsideruar si partnerin më të fortë të policisë në betejën me paligjshmërinë.
Ministri i Brendshëm Balla përfundim të fjalës së tij, duke folur për rëndësinë e Kodit Etik, u shpreh se ai duhet të jetë udhërrëfyes për çdo punonjës policie.
