Austria është zhytur në zi pas një sulmi tragjik me armë zjarri që ndodhi në qytetin Graz, ku një ish-nxënës 21-vjeçar vrau 10 persona në një shkollë dhe më pas i dha fund jetës.
Për nder të viktimave, autoritetet shpallën tri ditë zie kombëtare. Qytetarë të shumtë janë mbledhur në sheshin kryesor të Grazit, duke ndezur qirinj dhe vendosur lule pranë shkollës ku ndodhi masakra.
Kancelari austriak Christian Stocker e quajti të martën “një ditë të errët në historinë e vendit” dhe e përshkroi tragjedinë si një “plagë në zemrën e kombit”.
Ai theksoi se shkollat duhet të jenë hapësira sigurie dhe shprese, jo vende frike. “Në këto momente të rënda, njerëzillëku është arma jonë më e fortë,” deklaroi ai.
Sipas Ministrit të Brendshëm Gerhard Karner, autori i sulmit ishte një ish-student i shkollës “Dreierschützengasse”, i cili nuk kishte përfunduar studimet.
Ai nuk kishte pasur më parë probleme me ligjin dhe posedonte një leje të ligjshme për armë zjarri. Në vendngjarje u gjet një letër që besohet të jetë shkruar nga autori, por përmbajtja e saj ende nuk është bërë publike.
Ndër viktimat është edhe një vajzë e re me origjinë nga Kosova, identifikuar si L. Bajrami, rreth 15 vjeçe. Lajmi u konfirmua nga gazetari kosovar Vehbi Haliti, i cili jeton në Graz.
“Kjo është një nga tragjeditë më të mëdha që nga Lufta e Dytë Botërore,” tha Haliti.
Paraprakisht dyshohet se shkaku i këtij akti ekstrem ka qenë bullizmi i vazhdueshëm që autori kishte përjetuar gjatë kohës kur ishte nxënës i kësaj shkolle.
Hetimet po vazhdojnë për të zbardhur plotësisht motivet dhe rrethanat e ngjarjes.
