Ish-ministri i Drejtësisë,m Ylli Manjani ka reaguar pas dorëheqjes së Luan Ramës nga çdo funksion në LSI. Në një status në Facebook, Manjani shkruan se Rama nuk ka asnjë përgjegjësi politike për humbjen e mandatit të LSI në Vlorë. Ai thotë se dy javë para ditës së votimit Rama u shpall “tradhëtar” dhe LSI ndërkohë bënte thirrje që të votohej numri dy i listës.
Manjani shprehet se Luan Rama nuk ka pse shpjegohet për dorëheqjen e tij sepse nuk është i dorëhequr, por i tradhëtuar
“Luan Rama, pavarësisht arësyeve që parashtron në dorëheqjen së Tij nga detyrat partiake, NUK KA ASNJË PËRGJEGJËSI politike për humbjen e mandatit të LSI në Vlorë. Në parim shqiptarët në zgjedhjet e fundit gjykuan LSI, jo kandidatët e saj. E çfarë gjykimi, pa!? Në Vlorë, ekuacioni u bë edhe më i vështirë kur 2 javë para ditës së votimit Luani u shpall “tradhëtar”!!!! Se kë e çfarë tradhëtoi Luani një dreq e di!? Them dreq se nuk dua të ngatërroj zotin me këto punë…Të shpallesh armik para votimit, të dilet në thirrje publike “mos votoni Luanin” dhe, të mendosh të marrësh dhe mandat këtë vetëm një politikë e çakërdisur e bën! Ndaj them se Luani nuk ka asnjë përgjegjësi. Ai nuk është vlonjat dhe nuk mori votat e shokëve të lagjes, që të jetë përgjegjës. Ai shkoi atje si përfaqësues politik dhe u shpall armik nga partia e tij, mu para votimit. LSI bënte thirrje të votohej nr. 2 i listës…Ja, kaq e thjeshtë është! Nga ana tjetër, Luani s’ka përse spjegohet gjatë për dorëheqjen e Tij, sepse ai nuk është i dorëhequr, por i tradhëtuar! I tradhëtuar, por edhe i dënuar për tradhëti…”, shkruan Manjani.
Luan Rama dha dorëheqjen nga çdo funksion politik në LSI ditën e sotme, pasi deklaroi se drejtuesi duhet të mbajë përgjegjësi për humbjen. Kujtojmë se ai ishte i pari për listën e LSI në qarkun e Vlorës, por nuk arriti dot të siguronte mandatin e deputetit.
