Në Gjykatën e Posaçme kundër Korrupsionit dhe Krimit të Organizuar po zhvillohet sot seanca e dytë e dëshmisë së Artan Tafanit, i penduari i drejtësisë dhe pjesë e grupit të Laert Haxhisë.
Tafani po rrëfen para togave të zeza ngjarjet kriminale ku ka qenë i përfshirë bashkë me emra të tjerë të njohur të këtij grupi.
Për këtë dosje të rëndë janë vënë në bankën e të pandehurve:
• Lulzim Spahija (i njohur edhe si Lulzim Arapi)
• Artan (Marjus) Tafani – i penduar i drejtësisë
• Ligor Romacka
• Bledar Berberi
• Erisiano Abedini
• Mariglen Topuzi
• Enriko Xhahysa
• Bujar Abedini
• Idriz Manej
Në seancën e sotme, Tafani ka zbardhur më shumë detaje për ekzekutimin e Albi Bashaliut, duke treguar edhe mënyrën si janë ndarë paratë për atentatin. Ai ka sqaruar se vetë mori 20 mijë euro, ndërsa pjesa tjetër u nda mes Laert Haxhisë dhe Lulzim Arapit.
Sipas tij, pagesat janë bërë nga babai i Laert Haxhisë, Qamil Haxhiu, i cili ishte i pranishëm dhe aktiv në shpërndarjen e parave pas krimit.
“Pasi mbaruam punë, nuk na ndezi makina ‘Audi’ që kishim. Mora ‘Benz’-in gri me targa greke. Pasi kaluam Kavajën, kam çmontuar armën, në atë kohë kalonin dhe makina të tjera që s’duhet të na shikonin që hidhnim pjesë të armës. Kur erdhëm në Tiranë, kemi lënë ‘Benz’-in në Astir dhe, për të humbur gjurmët, kemi ecur në këmbë.
Kemi marrë 30 mijë euro, na ka sjellë i ati i Laertit, Qamil Haxhiu, dhe atë 30 mijë i kemi ndarë në 3 pjesë: unë, Lulzim Arapi dhe Laerti. Këto lekët i ka dhënë një person që e thërrisnin Limi, me të cilin para ngjarjes fliste Laerti me të. Pas një muaji erdhën edhe lekët e tjera, dy herë nga 10 mijë, na i solli Qamili. I ati i Laertit, Qamili, një herë në dy-tre muaj vinte tek ne dhe qëndronte disa ditë.” – përfundoi Tafani.
