Hristov Stoichkov nuk është aspak i qartë për atë që ka ndodhur te Barcelona sa i takon Lionel Messit. Legjenda e katalanasve, që ka luajtur rreth 200 ndeshje me Barcelonën, thotë se në këtë histori ka gënjeshtra dhe të pavërteta të mëdha, por vetëm koha do t’i tregojë. Gjithashtu, Stoichkov thumboi drejtuesit e klubit katalanas për mënyrën e gabuar në menaxhimin e skuadrës.
“Është diçka e vështirë që të pranosh largimin e Lionel Mesit. Ai ishte legjenda dhe lideri i skuadrës. Ka bërë histori këtu dhe besoj që nuk do të zëvendësohet nga të tjerët. Nuk e kam kuptuar ende se çfarë ndodhi, por kjo histori është me shumë të fshehta dhe ka një gënjeshtër të madhe në mes.
Nuk e di kur do të zbulohet, por klubi mund të kishte bërë më mirë për ta mbajtur dhe për ta rinovuar kontratën e tij. Barcelona ka humbur shumë në aspektin sportiv dhe në atë të imazhit. Duhet shumë punë për ta korrigjuar këtë situatë”, u shpreh Stoichkov.
Messi u transferua pak ditë më parë nga Barcelona drejt PSG-së, si agjent i lirë. “Pleshti” argjentinas do të paguhet 35 milionë euro në sezon dhe ka nënshkuar një kontratë 2+1. Gjithashtu, Messi do të mbajë fanellën me nr. 30, pikërisht numrin e parë që mbajti dhe te Barcelona, kur ishte vetëm 17 vjeç.
