Kuvendi i Kosovës ka dështuar sërish të konstituohet, edhe në përpjekjen e 46-të që u mbajt të dielën, më 13 korrik.
Në sallë ishin të pranishëm 82 deputetë, por përplasjet politike dhe mungesa e konsensusit vijojnë ta bllokojnë procesin.
Pavarësisht deklarimeve publike për rëndësinë e krijimit të institucioneve, partitë politike mbeten të ngurta në pozicionet e tyre.
Partitë opozitare PDK, LDK, AAK dhe Lista Serbe refuzojnë të propozojnë anëtarë për komisionin që do të mundësonte votimin e fshehtë për zgjedhjen e kryetarit të Kuvendit. Ato e kundërshtojnë mënyrën e organizimit të këtij votimi, duke e konsideruar antikushtetues ndryshimin e procedurës në këtë fazë.
Nga ana tjetër, Lëvizja Vetëvendosje, që ka fituar më shumë vota në zgjedhjet e 9 shkurtit, insiston që kandidatura e Albulena Haxhiut të votohet përmes një procedure të vetme, me votim të fshehtë.
Nëse nuk arrin të sigurojë 61 votat e nevojshme, Vetëvendosje ka paralajmëruar tërheqjen e saj nga kandidimi. Deri tani, Haxhiu ka dështuar disa herë në votime të hapura, pasi një pjesë e deputetëve e konsiderojnë të papranueshme dhe përçarëse.
Ndërkohë, po afron afati kushtetues për formimin e Kuvendit, 26 korriku , por mbetet e paqartë se çfarë do të ndodhë nëse dështimi vazhdon.
Gjykata Kushtetuese nuk ka sqaruar hapat e mëtejshëm në rast të moskonstituimit, ndërsa presidentja Vjosa Osmani ka paralajmëruar se mund t’i drejtohet sërish Gjykatës për interpretim të mëtejshëm.
Në shenjë pakënaqësie me bllokadën politike, disa pjesëtarë të shoqërisë civile kanë protestuar para Kuvendit, duke kërkuar nga deputetët që të marrin përgjegjësinë që u takon.
