Drejtuesi i Lëvizjes Vetëvendosje në Shqipëri, Boiken Abazi thotë se Richard Grenell dhe Irfan Hysenbelliu janë autorët e projektit të “Open Balkans”, i njohur me herët si mini-shengeni. Në një postim në Facebook, Abazi thotë se Hysenbelliu e mbajti ish-të dërguarin e SHBA-ve për dialogun Kosovë-Serbi, në resortin e tij në Golem këtë javë e më pas e shëtiti në brigjet e jugut.
Drejtuesi i VV në Shqipëri thotë se gazetarja e News 24, me pronar Hysenbelliun, nuk e pyeti Grenell-in për urimin që ai i bëri Serbisë për “Vidovanin”, festën fetare mbi të cilën Serbia përpiqet të justifikojë ekspansionin dhe hegjemoninë e saj në rajon. Abazi shprehet se ndoshta Hysenbelliu e kishte ngritur tashmë një dolli për Zonën e Novi Sadit.
Kjo është arsyeja, sipas Abazit, se Irfan Hysenbelliu, gjithashtu pronar i birrës “Korça”, ftoi në festën e birrës në Korçë, këngëtarin Goran Bregoviç, i cili me muzikën e tij ka frymëzuar masakrën serbe në Kosovë.
“Kështu është kjo puna e Zonës së Novi Sadit, bashkon financiarisht oligarki e pushtet të korruptuar shqiptar me kriminelë lufte të Serbisë e me ish ambasadorë që i falen parasë, dhe pastaj krijon edhe lidhje shpirtërore me këngë të kënduara nëpër masakra!”, shkruan Abazi.
Postimi i plotë:
Bregoviç, Grenell dhe Hysenbelliu
Gjithkush ka të drejtën të kundërshtojë ardhjen e Goran Bregoviçit në Festën e Birrës në Korçë, pasi këngët e tij janë përdorur si frymëzim nga çetnikët e Serbisë në masakrat që janë kryer ndaj shqiptarëve dhe popujve të tjerë të Ballkanit. Shqiptarët do duhej ta kishin këtë vetëdije dhe ndjeshmëri.
Ama duhet ngritur edhe pyetja se ç’punë kishte Irfan Hysenbelliu që e mbajti këtë javë ish ambasadorin Richard Grenell në resortin tij në Golem, e më tej e shëtiti brigjeve të jugut (shiko fotografinë më poshtë). Grenelli ka qenë e mbetet një nga mbështetësit kryesor të “Zonës së Novi Sadit”, e njohur ndryshe si Mini-Shengen/Open Balkan/Jugosllavi e Re. Grenelli ia uroi së fundmi Serbisë edhe festën fetare të “Vidovdanit”, mitin mbi të cilin Serbia përpiqet të justifikojë ekspansionin dhe hegjemoninë e saj në rajon.
Por gazetarja e TV Neës 24, me pronar Irfan Hysenbelliun, “çuditërisht” nuk e pyeti Grenellin gjatë intervistës për urimin e tij për Vidovdanin e Serbisë. Mbase ajo nuk e ndjeu të nevojshme, sepse mbase Hysenbelliu e kishte ngritur tashmë një dolli me Grenellin për Zonën e Novi Sadit.
Mbase Hysenbelliut, pronarit të Birrës Korça, sponsorit kryesor të Festës së Birrës në Korçë bashkë me Bashkinë e Korçës, i ka vajtur në mendje që dollinë për Vidovdanin ta ngrenë edhe në Korçë me kryetarin e Bashkisë nën tingujt e këngës “kallashnikov” të Bregoviçit.
Kështu është kjo puna e Zonës së Novi Sadit, bashkon financiarisht oligarki e pushtet të korruptuar shqiptar me kriminelë lufte të Serbisë e me ish ambasadorë që i falen parasë, dhe pastaj krijon edhe lidhje shpirtërore me këngë të kënduara nëpër masakra!
